Эмилиано Мартинес қимор бўйича текширилмоқда

“Астон Вилла” клуби ва Аргентина терма жамоаси дарвозабони Эмилиано Мартинес Англия футбол ассоциацияси (FA) томонидан пул тикиш рекламаси қоидаларини бузганлик эҳтимоли билан текширилмоқда. Бу ҳақда “The Atletik” нашри хабар берди.  

Нашрнинг ёзишича, тергов Мартинеснинг Аргентинадаги букмекерлик компанияси билан ҳамкорлиги билан боғлиқ. У 2024 йил июнь ойидан буён компаниянинг бренд элчиси сифатида фаолият юритиб келмоқда.

Компания футболчини ўз брендининг расмий юзи сифатида таништирган. 2025 йил октябрь ойида эса янги реклама кампанияси бошланиб, унда Мартинес профессионал пойга ҳайдовчиси бўлган укаси Алехандро Мартинес билан бирга иштирок этган.

FA қоидаларига кўра, профессионал футболчиларга ўзлари иштирок этадиган ёки таъсир кўрсатиши мумкин бўлган мусобақалар билан боғлиқ пул тикиш хизматларини реклама қилиш тақиқланади.

Таъкидлаш жоизки, Мартинес ҳамкорлик қиладиган букмекерлик компанияси Премьер-лига, Англия кубоги ва Еврокубоклар билан ҳам ҳамкорлик қилади. “Астон Вилла” эса жорий мавсумда ушбу мусобақаларнинг барчасида иштирок этмоқда. 

FA футболчи билан боғлиқ вазиятдан хабардор эканини тасдиқлаган. “Астон Вилла”, Эмилиано Мартинес ва букмекерлик компанияси бу масала юзасидан изоҳ беришдан бош тортган.