Эбола вакцинасини яратиш учун 60 млн доллар ажратилади

Эпидемияларга тайёргарлик кўриш коалицияси Эбола вирусининг Бундибугё штаммига қарши вакцина ишлаб чиқиш учун бир нечта тадқиқот гуруҳлари, жумладан Moderna'га қарийб 60 миллион доллар ажратади. Айни пайтда ушбу штамм бўйича Эбола эпидемияси Конго Демократик Республикасининг шарқида қайд этилган. Бу ҳақда “Reuters” хабар берди.

Эпидемияларга тайёргарлик кўриш коалицияси COVID-19 пандемияси даврида вакциналар ишлаб чиқилишини молиялаштирган илк халқаро ташкилотлардан бири бўлган.

Ташкилот раҳбари Ричард Хатчеттнинг айтишича, Эбола вирусининг Бундибугё штаммига қарши вакциналар бир неча ой ичида синов босқичига тайёр бўлиши мумкин.

Ҳозирча ушбу штаммга қарши тасдиқланган вакцина ёки даволаш воситаси мавжуд эмас.

Хатчетт яқин келажакда вакциналар пайдо бўлиши уларни харид қилиш ва етказиб беришни молиялаштириш бўйича музокараларга йўл очишини таъкидлаган. Шу билан бирга, у вакцина яратиш жараёни катта ноаниқликлар билан боғлиқлиги, Конго шарқидаги беқарор вазият эса клиник синовларни ўтказишда қўшимча қийинчиликлар туғдириши мумкинлигидан огоҳлантирган.

CEPI Оксфорд университети томонидан ишлаб чиқилган вакцинани ишлаб чиқариш учун 8,6 миллион доллар ажратишга тайёрлигини маълум қилган.

Ҳайвонларда ўтказилган тадқиқотлар ушбу вакцинанинг самарадорлигини тасдиқлаган.