Дуров Францияни тарк этолмаётганидан норози бўлди

Telegram мессенжери асосчиси Павел Дуров ҳозиргача Францияни тарк эта олмаганидан ажабланаётгани ва бундан норози эканлигини маълум қилди. Бу ҳақда у америкалик журналист Такер Карлсон билан интервьюда сўз очди.

Унинг сўзларига кўра, ушбу мамлакатда Telegram фойдаланувчиларининг бир фоиздан камроғи яшашига қарамай, у Франция ҳудудидан чиқиб кета олмаяпти.

Бугунги кунга келиб, уни жиноятчилар Telegram’дан фойдалангани ва уларга қарши етарли чоралар кўрмагани учун “соҳавий ҳамкор” сифатида айблаган. Дуров бу айбловни ҳаддан ташқари кенг талқин деб ҳисоблаган. Унинг айтишича, Telegram дунё бўйлаб 1 миллиард фойдаланувчига эга ва компания юридик масалаларга катта маблағ ажратмоқда.

Дуров, шунингдек, ҳибсга олингач, 4 кун ойнасиз ва тўшаксиз камерада ушлаб турилганини билдирган. У телефонини фақат Telegram’ни тест қилиш учун ишлатгани, ҳаттоки унда SIM-карта ҳам бўлмаганини таъкидлаган.

Дуровнинг айтишича, Франция ҳукумати унга нисбатан қандай асосда суриштирув олиб бораётгани ҳали ҳам аниқ эмас. Унга кўра, аввалига француз амалдорлари Telegram’ни “расмий сўровларга жавоб бермаганликда” айблаган. Бироқ Дуровнинг даъво қилишича, 2023 йил сентябригача Telegram ҳеч қандай қонуний талабга асосланган ҳужжат олмаган. Бу эса Франциянинг ўз қонунларини ва Евроиттифоқ меъёрларини бузганини англатади.

“Кейинчалик, амалдорлар Telegram’ни контентни етарли даражада моделлар (фильтрлаш) қилмаганликда айблаган, бироқ бу айблов мустақил суд экспертизаси натижасида рад этилган”, деган Telegram асосчиси. 

Франция ва Бирлашган Араб Амирликларининг фуқароси бўлган Дуров 2024 йилнинг августида Франция аэропортида ҳибсга олинганидан бери Францияда суд назорати остида бўлиб келган. Сентябрь ойида унга ўзи бошқарадиган шифрланган хабар алмашиш платформаси Telegram орқали ноқонуний фаолият билан боғлиқ олтита айблов бўйича расман айблов эълон қилинган.

Тергов жараёнида Дуров 15 март кунидан 7 апрель кунигача Дубайда бўлган. Бироқ бошқа хорижий сафарларга чиқишига рухсат берилмаган.

Эслатиб ўтамиз, олдинроқ Павел Дуров расмий Парижни Руминиядаги сайловларга таъсир ўтказишга уринишда айблаганди. Расмий Париж эса бу айбловларни қатъиян рад этди ва барчани масъулият ва Руминия демократиясини ҳурмат қилишга чақирди. Шундан сўнг, Париж Дуровнинг потенциал инвесторлар билан учрашувлар ўтказиш учун АҚШга боришига рухсат бермади ва бу сафар учун асос йўқлигини билдирди.