Дурдона Ҳакимованинг хонадоши қотилликдан сўнг бедарак йўқолди (видео)

Аввалроқ, Туркиянинг Истанбул шаҳрида ўзбекистонлик аёл Дурдона Ҳакимова ўлдирилиб, жасади бошсиз ҳолда чиқинди контейнерига ташлаб кетилгани ҳақида хабар берилган эди. Истанбулда марҳума билан бир уйда яшаган 32 ёшли аёл қотиллик кунидан буён топилмаяпти. Бу ҳақда Туркиядаги ўзбек аёлларининг ҳуқуқларини ҳимоя қилиш жамияти хабар берди.

Маълум қилинишича, 1994 йилда туғилган Эргашалиева Сайёра Баҳромжон қизи 2025 йил 28 декабрь куни Туркияга ишлаш мақсадида борган. Қизидан хабар ололмаётган ота-она уни топиш умидида Туркияга учиб борган. Онасининг сўзларига кўра, қизи билан охирги марта қотиллик содир бўлган кун – 23 январдан бир кун олдин гаплашган. Шундан кейин эса алоқа узилган.

Жамият хабарида айтилишича, адвокатларнинг профессионал ва шошилинч саъй-ҳаракатлари натижасида тергов ишлари жадаллаштирилиб, иккинчи жиноят эҳтимоли юзасидан ДНК таҳлиллари, шунингдек, ҳодиса жойини батафсил кўздан кечириш каби муҳим тергов ҳаракатлари амалга оширилган.

Эслатиб ўтамиз, аввалроқ Истанбулда ўлдирилган аёлнинг жасади бўлаклари топилгани ҳамда жасаднинг Ўзбекистонга қайтарилгани хабар қилинган эди.

Эъзоза Олимова