Дунёдаги энг гўзал аёллар яшовчи давлатлар рейтинги эълон қилинди

Колумбия дунёдаги энг гўзал аёллар яшайдиган мамлакат деб тан олинди. Бундай рейтингни демографик маълумотлар ва статистикага ихтисослашган “World Population Review” сайти экспертлари тузди.

Бунинг учун улар ижтимоий сўровномалар натижаларини, турли гўзаллик танловлари якунларини таҳлил қилган, шунингдек, жаҳон юлдузларининг машҳурлигини уларнинг келиб чиқишига урғу берган ҳолда баҳолаган.

Дунёдаги энг гўзал аёллар яшайдиган мамлакатларнинг биринчи ўнлиги қуйидагича кўринишга эга:

1. Колумбия;
2. Польша;
3. Греция;
4. Россия;
5. Чехия;
6. Швеция;
7. Исландия;
8. АҚШ;
9. Бразилия;
10. Япония.

Рўйхатнинг энг сўнгги қаторларидан Венесуэла, Албания ва Испания вакилалари жой олган.

Экспертларнинг билдиришича, лотин америкалик аёллар ўз гўзаллиги билан дунёни мафтун этган. Масалан, Бразилияни супермоделлар ватани деб аташ мумкин – Жизель Бюндхен, Адриана Лима ҳақида кўпчилик эшитган. Колумбия эса дунёга хонанда Шакира ва актриса София Вергара каби бутунжаҳонга машҳур гўзалларни тақдим этган.

Тадқиқотчилар француз аёлларининг гўзаллигини ҳам алоҳида қайд этган – бу ўринда Брижит Бардо, Катрин Денёв ва Марион Котийярни ёдга олиш лозим. Франция рейтингда 12-ўринда қайд этилган бўлиб, ундан олдинги ўринни Германия эгаллаган. Экспертлар италиялик аёлларнинг жозибадорлигини ҳам тилга олган – бунда Моника Беллуччи, Софи Лорен ва Изабелла Росселлини каби юлдузларнинг хизмати катта.

Рейтингдан Марказий Осиё давлатлари ўрин олмаган.

Эслатиб ўтамиз, аввалроқ кўчиб ўтиш учун энг яхши давлатлар рейтинги эълон қилинган эди. Ушбу рейтингда иккинчи ўриндан юқорига кўтарилган Швейцария 2026 йилнинг мутлақ етакчисига айланган. Мамлакат дунёдаги энг юқори даромад топиш имкониятлари, қулай тиббиёт, юқори хавфсизлик стандартлари ва ривожланган инфратузилмаси туфайли биринчи поғонани эгаллаган.