Дунё давлатлари Исроилнинг Эронга ҳужумига қандай қарамоқда?

Аввалроқ, Исроил Эроннинг ҳарбий объектларига 100 дан ортиқ ракеталар билан зарба бергани хабар қилинган эди. Бунга бир қатор дунё мамлакатлари муносабат билдирди.

Саудия Арабистони

Мамлакат Ташқи ишлар вазирлиги Саудия Арабистони Қироллиги Эрон Ислом Республикасига қарши ҳарбий ҳужумларни кескин қоралашини ва уларнинг суверенитети ҳамда халқаро қоидалар ва ҳуқуқларни бузилганини билдирган.

Вазирликка кўра, қироллик минтақадаги кескинликнинг давом этишини ва можарони кенгайтиришни рад этувчи қатъий позициясини яна бир бор тасдиқлайди. Бу ҳаракатлар минтақадаги давлатлар ва халқларнинг хавфсизлиги ва барқарорлигига таҳдид солмоқда.

Уммон Султонлиги

Уммон Ташқи ишлар вазирлиги ҳам ўз баёнотида Исроил томонидан Эрон ҳудудига қилинган ҳаво ҳужумларни кескин қоралади. ТИВ бу мамлакат суверенитетининг ва халқаро ҳуқуқ меъёрларининг қўпол бузилиши эканини, шунингдек, зўравонлик доирасини кучайтириб, кескинликни камайтириш ва инқирозларни тинч ва дипломатик йўл билан ҳал қилишга қаратилган саъй-ҳаракатларни пучга чиқаришини билдирган. Шунингдек, вазирлик ҳамжамиятни агрессияни тўхтатиш ва минтақа ҳамда қўшни давлатлардаги бу қўпол ҳуқуқбузарликларни тугатиш учун чоралар кўришга чақирган.

Америка Қўшма Штатлари

“Эронни Исроилга қарши ҳужумларини тўхтатишга чақирамиз, шунда бу жанговар цикл ҳеч қандай қўшимча кескинлашувсиз тугаши мумкин”, деди АҚШ Миллий хавфсизлик кенгаши вакили Шон Саветт.

Саветтга кўра, Исроилнинг жавоб ҳужуми ўзини мудофаа қилиш ҳаракати бўлган ва фақат ҳарбий нишонларга қаратилиб, аҳоли пунктларидан четда амалга оширилган. Шунингдек, у АҚШнинг операцияда иштирок этмаганини таъкидлаган ва мамлакатнинг мақсади дипломатияни тезлаштириш ва Яқин Шарқдаги кескинликни камайтириш эканини билдирган.

Оқ уйнинг юқори мартабали амалдорига кўра, Байден маъмурияти Исроил ва Эрон ўртасидаги тўғридан тўғри ҳарбий алмашинувни якунлаш керак деб ҳисоблайди. АҚШ Президенти Жо Байден Исроил операцияси давомида ва ҳужумлар амалга оширилган пайтда доимий равишда хабардор қилинган.

Пентагон вакили Патрик Райдер АҚШ Мудофаа вазири Ллойд Остин Исроилдаги мавқедоши Йоав Галант билан суҳбатлашганини ва АҚШнинг Исроил хавфсизлиги ва ўзини мудофаа қилиш ҳуқуқига бўлган кучли мажбуриятини яна бир бор тасдиқлаганини маълум қилган.

Буюк Британия

Буюк Британия Бош вазири Кир Стармер Эронни Исроил ҳужумларига жавоб бермасликка чақириб, барча томонларни ўзини тийишга ундади.

“Исроил Эрон тажовузига қарши ўзини ҳимоя қилиш ҳуқуқига эга экани аниқ. Худди шунингдек, минтақадаги кескинликнинг янада кучайишининг олдини олишимиз керак ва барча томонларни сабр-тоқат кўрсатишга ундайман. Эрон бунга жавоб бермаслиги зарур”, деди у Самоа давлатида бўлиб ўтган Ҳамдўстлик давлатлари раҳбарлари йиғилишида доирасидаги матбуот анжуманида.

Покистон

Покистон Ташқи ишлар вазирлиги Исроилнинг Эрон суверенитети ва ҳудудий яхлитлигига қаратилган ҳарбий ҳужумларини “БМТ Низоми ва халқаро ҳуқуқнинг жиддий бузилиши” деб атади.

Вазирликка кўра, ушбу ҳужумлар минтақавий тинчлик ва барқарорлик йўлига путур етказади ва аллақачон беқарор бўлган минтақада хавфли кескинликни кучайтиради. Шунингдек, минтақадаги кескинлик ва можароларни кучайтиришга тўлиқ жавобгарлик Исроил зиммасида қолади.

Вазирлик БМТ Хавфсизлик Кенгашини халқаро тинчлик ва хавфсизликни таъминлаш учун ўз ролини бажаришга ва Исроилнинг минтақадаги масъулиятсизлиги ва жиноятчилик хатти-ҳаракатларини тўхтатиш учун зудлик билан чора кўришга чақирди.

Бирлашган Араб Амирликлари

Форс кўрфази давлати Эронни ҳарбий нишонга олишни қоралаган ва кескинликнинг олдини олиш учун максимал даражада ўзини тийиш муҳимлигини таъкидлаган.

Малайзия

Малайзия Ташқи ишлар вазирлиги ҳам Исроил ҳужумларини халқаро ҳуқуқнинг аниқ бузилиши эканини таъкидлаб, бу ҳаракатлар минтақавий хавфсизликка жиддий путур етказишини билдирган.

Шунингдек, мамлакат душманликни зудлик билан тўхтатишга ва зўравонликлар занжирини тугатишга чақирган.
Вазирлик баёнотида айтилишича, Исроилнинг Яқин Шарқдаги мамлакатларга давом этаётган ҳужумлари минтақани кенгроқ уруш ёқасига олиб келмоқда.

Бундан ташқари, Яман, Иордания, Қувайт ва Ироқ давлатлари ҳам ушбу вазиятга муносабат билдириб, Исроилнинг Эронга ҳужумини қоралаган ва мамлакатларни тинчлик ўрнатишга чақирган.