“Дружба”. Киев Венгрияни Зеленскийга ақл ўргатмасликка чақирди

north_east

Трамп Украинанинг қилган ишидан ғазабланди

Украина Ташқи ишлар вазири Андрий Сибига кеча, 24 август куни венгриялик мавқедоши Петер Сияртони Украина етакчиси Владимир Зеленскийга буйруқ бермасликка чақирди. Бу ҳақда у Сияртонинг Х ижтимоий тармоғидаги постига жавобан ёзди.

“Украина Президентига нима қилиш ва қачон гапириш кераклигини айтишнинг ҳожати йўқ. У Венгриянинг эмас, Украинанинг Президенти”, деб ёзди Сибига.

Можарога Сияртонинг Украина Мустақиллигининг 34 йиллигига бағишланган матбуот анжуманида Зеленскийнинг баёнотига муносабати сабаб бўлди. 

Украинанинг “Европейская Правда” нашрининг ёзишича, Зеленский “Дружба” нефть қувуридаги зарбалар Венгриянинг Украинанинг Европа Иттифоқига қўшилиши бўйича позицияси билан бевосита боғлиқлигига ишора қилган. 

“Биз доимо Украина ва Венгрия ўртасидаги дўстликни қўллаб-қувватлаганмиз. Энди дўстликнинг мавжудлиги Венгрия позициясига боғлиқ”, деган Зеленский.

Венгрия Ташқи ишлар вазири эса Украина раҳбарининг бу сўзларини таҳдид сифатида қабул қилди.

“Зеленский Венгрияга таҳдид қилиш учун Украина миллий байрамидан фойдаланди. Биз Украина Президентининг қўрқитишини қатъиян рад этамиз”, деб ёзди Сиярто. 

У, шунингдек, Зеленскийни Венгриянинг энергетик хавфсизлигига қаратилган “ҳужумларга чек қўйишга” чақирди. Сияртонинг энергия хавфсизлиги ҳақидаги сўзларини шарҳлар экан, Андрий Сибига Венгрияни нефть таъминотини диверсификация қилишга ва “бутун Европа каби Россиядан мустақил бўлишга” чақирди.

Маълумот учун, 18 августга ўтар кечаси Украина қуролли кучлари Россия Федерациясининг Тамбов вилоятидаги “Николская” нефть насос станциясига ҳужум уюштирди, оқибатда “Дружба” магистрал нефть қувури орқали нефтни ҳайдаш бутунлай тўхтатилди. Венгрия ва Словакия 19 август куни кечқурун Россия нефтини қувур орқали етказиб бериш қайта бошлангани ҳақида хабар берди.

Аввалроқ, 13 август куни Украина дронлари “Дружба” нефть қувурининг энг йирик тугунига – Брянск вилоятидаги “Унеча” чизиқли ишлаб чиқариш-диспетчерлик станциясига ҳужум қилган эди. Россиядан Венгрияга нефт етказиб бериш ҳам вақтинча тўхтатилди. 21 август куни Украина дронлари яна Унеча станциясига ҳужум қилди. Ҳозирги вақтда нефть Венгрия ва Словакияга қувур орқали етказиб берилмайди.