Допинг тестидан ўта олмаган биатлончи Олимпиадада иштирок этади

Италиялик биатлончи Ребекке Пасслер антидопинг қоидаларини бузгани учун вақтинчалик дисквалификациядан оқланиб, Олимпиадада иштирок этиш ҳуқуқини тиклади. Бу ҳақда “Reuters” хабар берди.

Жорий йилнинг 2 февраль куни Италия допингга қарши миллий ташкилоти спортчининг намунасида летрозол ва метанол моддалари аниқлангач, уни мусобақадан дисквалификация қилганди. Агентлик Пасслернинг тақиқланган моддани тасодифан қабул қилгани ҳақидаги изоҳини инобатга олиб, унга ўйинларга йўлланмани қайтариб берган. Ребекка жорий йилнинг 16 февраль куни жамоага қўшилади.

“Бу жуда қийин кунлар бўлди. Мен доим ўзимга ишонганман. Менга ёрдам берган барчага — вазиятимни ҳал қилган адвокатлардан тортиб, Қишки спорт федерацияси, оилам ва дўстларимгача миннатдорлик билдираман. Энди мен ниҳоят биатлонга тўлиқ эътибор қаратишим мумкин”, дейди Пасслер.

Маълумот учун, 24 ёшли биатлончи ўсмирлар ўртасидаги жаҳон чемпионатларида еттита медаль, жумладан, битта олтин медални қўлга киритган. Шунингдек, Ребекке Пасслер Жаҳон кубоги эстафета баҳсларида иккита бронза медалига эга.  2025-2026 йилги мавсум умумий рейтингида 33-ўринни эгаллаган.