Дешам Испания билан ўйиндан кейин ҳакамни танқид қилди

Франция терма жамоаси бош мураббийи Дидье Дешам Жаҳон чемпионатининг ярим финалида Испанияга қарши учрашувни бошқарган сальвадорлик ҳакам Иван Бартоннинг фаолиятини танқид қилди. Бу ҳақда “L’Equipe” нашри хабар берди.

Аввалроқ Испания терма жамоаси Жаҳон чемпионатининг ярим финалида Францияни 2:0 ҳисобида мағлуб этган эди. Ғолиб жамоа сафида Микель Оярсабаль 22-дақиқада пенальтидан, Педро Порро эса 58-дақиқада гол урди.

“Испания жуда кучли жамоа эканини яна бир бор исботлади. Биз эса ўз имкониятларимиздан пастроқ ўйнадик ва одатдагидан кўпроқ техник хатоларга йўл қўйдик. Бунда Уильям Салибанинг жароҳат олиши ҳам, Адриен Рабьонинг иккинчи сариқ карточка олиш хавфи остида ўйнагани ҳам таъсир қилди. Финалга чиқиш учун энг яхши ўйинимизни кўрсатишимиз керак эди, аммо афсуски, бунинг уддасидан чиқа олмадик. Бу биз учун катта умидсизлик. Шу билан бирга, юмшоқ қилиб айтганда, айрим баҳсли ҳакамлик қарорлари ҳам сабаб бўлди”, дейди Дешам.

Франциялик мутахассис мағлубият учун ҳакамни айблашни истамаслигини, аммо унинг фаолияти саволлар туғдирганини таъкидлади.

“Қайси қарорларни назарда тутяпман? Энг аввало, биз ўзимиз қаерда хатога йўл қўйганимизни кўришимиз керак. Мен мағлубиятдан кейин баҳона қилаётгандек туюлишни истамайман. Лекин ҳакам Жаҳон чемпионати ярим финали даражасига мос келдими? Бу савол очиқ қолмоқда. Мен унинг ҳар бир қарорини муҳокама қилмоқчи эмасман. Биз ўйинни етарлича назорат қила олмадик, рақиб эса бизни хатога мажбур қилди. Бу ярим финал эди ва кўплаб футболчиларимиз учун бундай босқичдаги илк ўйин бўлди. Ўтмишдаги ютуқларимиз ўз қийматини йўқотмайди, аммо бундай рақибга қарши ҳам техник, ҳам жисмоний жиҳатдан энг юқори савияда бўлиш талаб этилади. Афсуски, бугун биз бунга эриша олмадик”, дея қўшимча қилди Дешам.

Эслатиб ўтамиз, Жаҳон чемпионатининг иккинчи ярим финалида бугун, 15 июль куни Англия ва Аргентина терма жамоалари ўзаро баҳс олиб боради. Финал учрашуви эса 19 июль куни бўлиб ўтади.