DeepSeek асосчиси дунёнинг энг бой СИ тадбиркорига айланди

Хитойнинг DeepSeek сунъий интеллект компанияси асосчиси Лян Вэньфэн дунёдаги энг бой сунъий интеллект компанияси асосчисига айланди. Унинг бойлиги компания жалб қилган янги инвестициялардан сўнг 36 миллиард АҚШ долларига етди. Бу ҳақда “The Economic Times” хабар берди.

Қайд этилишича, DeepSeek’нинг сўнгги инвестиция раунди натижасида компания қиймати 50 миллиард долларга баҳоланган. Шундан сўнг Лян Вэньфэннинг шахсий бойлиги 16,7 миллиард доллардан 36 миллиард долларга ошган. Натижада у Anthropic асосчиси Дарио Амодеи ва OpenAI ҳаммуассиси Грег Брокмандан ўзиб кетиб, сунъий интеллект соҳасидаги энг бой асосчига айланган.

Маълум қилинишича, DeepSeek 2026 йил июнь ойида 7,4 миллиард долларлик инвестиция жалб қилган. Ушбу инвестиция босқичида Лян Вэньфэннинг ўзи ҳам компанияга 3 миллиард доллар сармоя киритган. Ҳозирда у DeepSeek акцияларининг қарийб 78 фоизига эгалик қилмоқда.

Лян Вэньфэн 1985 йилда Хитойнинг Гуандун провинциясида туғилган. У Чжэцзян университетида электрон муҳандислик ҳамда ахборот ва коммуникация муҳандислиги йўналишларида таҳсил олган.

Тадбиркор 2023 йилда DeepSeek компаниясига асос солган. Унга қадар у икки нафар курсдоши билан биргаликда High-Flyer Asset Management номли квант инвестиция фондини ташкил этган. Ҳозирда мазкур фонд қарийб 8 миллиард долларлик активларни бошқаради.

Лян Вэньфэн сунъий интеллект ривожланиш истиқболини эрта англаган тадбиркорлардан бири сифатида эътироф этилади. У бошчилигидаги жамоа 2019 йилданоқ сунъий интеллектни ривожлантириш учун зарур бўлган юқори қувватли ҳисоблаш тизимларига ва Nvidia процессорларига катта сармоя киритган. Айнан шу тайёргарлик кейинчалик DeepSeek’нинг жаҳон бозоридаги тезкор ўсишига замин яратган.

“Bloomberg Billionaires Index” маълумотларига кўра, 36 миллиард долларлик бойлиги билан Лян Вэньфэн Хитойнинг энг бадавлат кишилари рейтингида саккизинчи ўринни эгаллаган. У бу борада Cambricon Technologies ҳаммуассиси Чен Тяньшидан кейинги ўринда қайд этилган.

Эслатиб ўтамиз, аввалроқ дунё бўйлаб миллиардерлар сони 2031 йилга бориб қарийб 4 минг нафарга етиши мумкинлиги ва бу бойлик йиғиш жараёни тобора тезлашаётганини кўрсатгани ҳақида хабар берилганди.