Яна ёнғин: “Пожарный”нинг суви томга етмади

Кеча, 16 август куни ижтимоий тармоқларда Мирзо Улуғбек туманида жойлашган кўп қаватли уйнинг том қисмида йирик ёнғин чиққани ҳақида хавотирли видеолар тарқалди. Унинг тафсилотларини ўрганиш мақсадида QALAMPIR.UZ жамоаси воқеа жойига борди. 

“Мен ўзим бу ерда яшамайман, қизим туради. Унинг айтишича, кечқурун чироқ ўчиб-ёниб, кейин йўлакни қуюқ тутун қоплаган. Ҳамма шошилиб ташқарига чиққанида, том ёнаётганини кўрган. Қутқарувчилар ёнғинни бир соатларда ўчирган. Бироқ тутун ҳидидан ҳеч ким ухлай олмаган. Эрталаб келиб қарасак, шахталардан сув оқаётган экан. Куёвимнинг айтишича, уйимиздаги тешик бўлмаганида, сув хонадонимизга кириб кетиши мумкин эди”, дейди гувоҳлардан бири.

Пойтахт ФВББга Мирзо Улуғбек тумани Асака кўчасида жойлашган уйнинг том қисмида ёнғин содир бўлаётгани ҳақида соат 22:02 да хабар келиб тушган. Шундан сўнг, Қутқарув экипажлари воқеа жойига зудлик билан етиб борган. Ёнғин соат 22:43 да қуршаб олинган ва 50 дақиқадан сўнг ўчирилган.

Гувоҳларнинг сўзларига кўра, ёнғинни ўчириш ишларига бир соатдан ортиқ вақт кетган. Тармоқларда тарқалган видеоларда эса, ўт ўчириш машиналари кўп қаватли уйнинг аркаси сабабли бино ҳовлисига киролмагани акс этган. Бироқ, расмийларнинг воқеа тафсилотлари юзасидан берган изоҳлари бунинг аксини кўрсатмоқда.

“Ёнғин содир бўлган ҳудудга қутқарув машинаси етиб келганда бино аркаси олдида бир қанча машиналар бор экан. Шу туфайли машина киришга бироз қийналди. Бироқ, биринчи навбатда биз алангани тарқалишини тўхтатишга ҳаракат қилдик. Бошқа блокдаги хонадонларнинг том қисмига ўтиб кетмаслиги учун уни зудлик билан тўхтатиш керак эди”, дейди пойтахт ФВББ ахборот хизмати ходими.

Кеча тарқалган видеоларда бинонинг фақат том қисми ёнаётгани кўринган эди. Ҳозир эса мансарда қисмига туташ хонадонларнинг ҳам ёниб кетганини кўришимиз мумкин. айни пайтда эса ёнғиндан зарар кўрган ҳудудда тозалаш ишлари олиб борилмоқда.

Бу сафар ҳам ёнғиннинг келиб чиқишига нима сабаб бўлгани ҳозирча аниқ эмас. Бироқ ёнғин оқибатида бир нечта хонадон моддий зарар кўрган, юқори қаватдаги айрим хонадонлар эса ёниб кетган. ФВББ билдиришича, ҳодиса оқибатида тан жароҳати олганлар йўқ. Ҳозирда ёнғиннинг келиб чиқиш сабаби ва етказилган зарар миқдори аниқланмоқда.

Ушбу репортажни тўлиқ шаклда QALAMPIR.UZ’нинг YouTube каналида томоша қилишингиз мумкин.