Дарё тубидан бутун бир армияни қуроллантиришга қодир хазина топилди

Ишчилар Дунай тубидан тасодифан 2200 йиллик тарихга эга, 500 та темир ёмбидан (слиток) иборат хазинани олиб чиқди. Топилмани ўрганаётган Австриядаги Инсбрук университети археологларининг аниқлашича, бу Европа тарихида милоддан олдинги даврга оид энг йирик металл партияси. Қазишмалар натижалари “Antiquity” журналида эълон қилинди.

Қайд этилишича, ҳодиса 2019 йилда Австриянинг Дайнхам қишлоғи яқинида юз берган. Маҳаллий экскаваторчи шағал қазиб олаётганда дарё тубидан ғалати занглаган буюмларни илдириб олган. Қимматбаҳо юк мўжиза туфайли металлолом қабул қилиш пунктига қайта эритиш учун юборилмай қолган. Олимлар тонналаб қумни қўлда элакдан ўтказиб, 193 та бутун темир бўлаги ва юзлаб бошқа бўлакларни ажратиб олган. Ҳар бир бўлакнинг вазни тахминан 4,5 килограммни ташкил этган, хазинанинг умумий вазни эса деярли бир тоннага баҳоланмоқда.

Артефактлар милоддан аввалги III–II асрларга оид. Мутахассисларнинг тахмин қилишича, барг шаклидаги ушбу хомашёлар бошқа буюмларга қайта ишлов бериш учун мўлжалланган ярим тайёр маҳсулот вазифасини ўтаган. Тадқиқотчиларнинг ҳисоб-китобларига кўра, ушбу металл ҳажмидан 500 га яқин қилич ёки 8000 тагача мих ясаш мумкин бўлган.

“Металлга ишлов беришдаги йўқотишларни ҳисобга олганда ҳам Дайнхамдан топилган темир катта бир жангчилар гуруҳини қуроллантиришга етарли бўларди”, дейди тадқиқотнинг етакчи муаллифи Петер Требше.

Кема ҳалокатининг аниқ сабаби жумбоқлигича қолмоқда, чунки экскаватор чўмичи маданий қатламни вайрон қилган. Бироқ қайиқ изларининг йўқлиги ва юкнинг жуда йирик ҳажми сувдаги транспорт ҳалокатига ишора қилмоқда. Эҳтимол, ёмбилар йирик мустаҳкамланган шаҳарлар ва темирчилик ишлаб чиқариши марказлари жойлашган Бавариядан оқим бўйлаб сузиб келаётган бўлган. Бунча миқдордаги металлни ташиш бир марталик битим учун жуда ноодатий ҳолат. Қимматбаҳо товар эвазига қабул қилиб олувчи томон олтин, кумуш ёки ҳатто чорва молларини бериши керак бўлган.

Эслатиб ўтамиз, аввалроқ Бельгиянинг Дендермонд шаҳрида қурилиш ишчилари бино ертўласидаги девор орасига яширилган, қиймати қарийб 9 млн еврога баҳоланаётган олтин тангалар ва қуймаларни топганди.