Чорвоқда чўкиб кетганлардан иккинчисининг ҳам жасади топилди

Жорий йилнинг 2 сентябрь куни Тошкент вилояти, Бўстонлиқ тумани, “Бурчмулла” МФЙ ҳудудидаги Чорвоқ сув омборида чўкиб кетган 3 нафар фуқаролардан иккинчисининг жасади топилди. Бу ҳақда Фавқулодда вазиятлар вазирлиги хабар берди.

Аввалроқ, чўкиб кетган ота ва ўғиллардан бирининг жасади топилган эди.

Қайд этилишича, бугун, 10 сентябрь куни соат 12:07 да Фавқулодда вазиятлар вазирлиги ғаввослари Чорвоқ сув омборида чўкиб кетган 3 нафар фуқаролардан иккинчисининг жасадини топган.

Ўзи нима бўлган эди?

Жорий йилнинг 2 сентябрь куни Тошкент вилоятидаги Чорвоқ сув омборида чўкиб кетган бир оила катерда сув бўйлаб сайр қилган ва суратга тушиш мақсадида чўмилиш тақиқланган ҳудудда тўхтаган. Кейинчалик улар шу жойнинг ўзида чўмилишга қарор қилган. Айтилишича, чўмилиш вақтида улар қутқарув нимчаларидан фойдаланмаган. Катерни бошқариб келган ҳайдовчи фуқароларга сувга тушишдан аввал қутқарув нимчаларини кийишни тавсия қилган, бироқ унинг тавсиясига риоя қилинмаган.

Сувга тушган биринчи бола оёғининг томири тортиб қолган. Шундан сўнг отаси уни қутқариш учун сувга тушган. Кейин яна бир ўғил сувга кирган. Шу тариқа ота ва унинг икки ўғли кетма-кет чўкиб кетган. Шунингдек, ҳодиса содир бўлган ҳудудда шамол бўлиб турган, сувда озгина тўлқин ҳосил бўлган. Ўша жараёнда чўкиш ҳолати юз берган. Ҳодиса вақтида катерда аёл ва яна уларнинг бир синглиси ҳам бўлган. Улар атрофдагилардан ёрдам сўраган. Катер ҳайдовчиси ҳам сувга тушиб, уларни қутқаришга уринган, бироқ бунинг имкони бўлмаган.