Чехия Россияни глобал интернетдан узишни таклиф қилди

Чехия Президенти Петр Павел НАТОни альянснинг шарқий қанотида Россия томонидан давом этаётган провокацияларга жавобан “қатъий ва, эҳтимол, асимметрик” чоралар кўришга чақирди. Бу ҳақда у “The Guardian” газетасига берган интервьюсида сўз очди. 

Петр Павел Москва “деярли 5-моддани қўллаш чегарасига етадиган, аммо доимо ундан бироз пастроқда қоладиган хулқ-атвор услубини” шакллантирганини айтган (НАТО Уставининг 5-моддасида альянснинг бир аъзосига қилинган ҳужум барчага қилинган ҳужум деб қаралиши кўзда тутилган). Павел бўлиши мумкин бўлган қадамлар сифатида Россияни глобал интернетдан узиб қўйиш, унинг банкларини халқаро молиявий тизимлардан чиқариб ташлаш, шунингдек, НАТО давлатлари ҳаво ҳудудини бузган самолётларни уриб туширишни тилга олган.

Жорий вазиятни шарҳлар экан, Павел альянс фақат дипломатик баёнотлар билан чекланиб қолмаслиги кераклигини таъкидлаган. 

“Афсуски, Россия чиройли сўзларни тушунмайди. Улар куч тилини тушунишади”, дейди у.

Истеъфодаги генерал ва НАТО Ҳарбий қўмитасининг собиқ раиси Павел, шунингдек, АҚШ Президенти Дональд Трампни тўғридан тўғри танқид қилишдан қочган ҳолда, “Россияга босим ўтказишни давом эттиришда АҚШ томонидан қатъият етишмаётганидан” ҳафсаласи пир бўлганини билдирган. Аввалроқ у Чехия ОАВларига “Трамп НАТОга бўлган ишончга путур етказиш учун Владимир Путин кўп йиллар давомида қилганидан кўра кўпроқ иш қилди” деб баён этган, бироқ бу сафар у иттифоқчиларнинг бирлашган ва янада қаттиққўл позицияси зарурлигига эътибор қаратган. Унинг сўзларига кўра, Россия ҳарбий раҳбарлари альянснинг уқувсизлиги ва иккиланишидан фойдаланаётганларини очиқ тан олган.

“Мен улардан нима учун провокациялар уюштираётганларини сўраганимда, улар “Чунки бу бизнинг қўлимиздан келади”, деб жавоб беришди”, дейди Павел.

Чехия Президенти муносабат билдирмаслик Москвани янада жиддийроқ эскалацияга ундашидан огоҳлантирган. 

“Агар биз бугун дуч келаётган қоидабузарликларга жавоб қайтармасак, Россия, эҳтимол, фаоллашади”, дейди у Польша Бош вазири Дональд Тускнинг шунга ўхшаш баҳоларини такрорлаб.

Эслатиб ўтамиз, аввалроқ фронтда муваффақиятларнинг йўқлиги, ортиб бораётган талофатлар, Украина дронларининг тобора муваффақиятли тус олаётган ҳужумлари ва махсус хизматлар талаби билан интернетнинг тез-тез ўчириб қўйилиши ҳамроҳлигида кечаётган иқтисодий инқироз Россия раҳбарияти вакилларини ўзлари олиб бораётган урушга янада сергакроқ нигоҳ билан қарашга мажбур қилаётгани ҳақида хабар берилган эди.