“Буни оқлаб ҳам, изоҳлаб ҳам бўлмайди!” Макрон Франция халқига мурожаат қилди (видео)

Франция Президенти Эммануэль Макрон мамлакатда яшаш харажатларининг ошишига қарши намойишлар ортидан юзага келган тартибсизликларни кескин қоралаб, зўравонлик содир этганлар жазоланишини билдирди. Бу ҳақда у кеча, 18 октябрь куни халққа йўллаган мурожаатида давомида сўз очди.

Президентнинг айтишича, тартибсизликлар вақтида дўконлар таланган, давлат бинолари ва шаҳар ҳокимиятларига ҳужум қилинган, айрим объектлар вайрон этилган. Жумладан, Лимож шаҳридаги XIX асрга оид шаҳар ҳокимияти биноси ёниб кетган, Лион марказидаги туристик ахборот идорасига ўт қўйилган, Марсель шаҳар ҳокимиятига бостириб кирилган, Бордода эса префект қароргоҳига ҳужум қилинган.

“Бунга қандай қилиб қўл уриш мумкин? Буни ҳеч қанакасига оқлаб бўлмайди, изоҳлаб ҳам бўлмайди”, дейди Макрон.

У тартибсизликларни содир этганларни қонуний талабларини билдирган намойишчилардан ажратиш кераклигини таъкидлаган.

Президентнинг қайд этишича, юз минглаб французлар яшаш харажатлари, ёқилғи нархлари ва ёшларнинг келажаги борасидаги хавотирларини билдириш учун намойишларга чиққан.

“Биз қонуний талабларни зўравонлик билан аралаштириб юбормаслигимиз керак. Зўравонлик бу талабларнинг эшитилишига тўсқинлик қилишига ҳам йўл қўймаслигимиз лозим”, дейди Франция раҳбари.

Макрон тартибсизликлар ортида ўта сўл гуруҳлар ва уларга қўшилган ҳуқуқбузарлар турганини айтиб, уларга нисбатан қатъий чоралар кўрилишини билдирган.

“Тартиббузарлар ва зўравонлик содир этаётган барча шахсларга нисбатан муросасиз бўламиз. Тинглаш ва мулоқот қилиш заифлик ёки жазосизлик дегани эмас”, дейди у.

Франция Ички ишлар вазирлиги маълумотларига кўра, жорий йилнинг 17 октябрь куни содир бўлган тартибсизликларда қарийб 2 400 киши қўлга олинган, 997 нафар полициячи ва жандармлар жароҳатланган. Улардан етти нафарининг аҳволи оғир бўлган.

Макрон ҳукуматдан воқеалар юзасидан текширув ўтказишни, хавфсизлик хизматларининг ҳаракатлари ва тартибсизликларнинг олдини олиш борасидаги камчиликларни аниқлашни талаб қилган.

Президент, шунингдек, зарурат туғилганда маҳаллий ҳокимият органлари айрим йиғилишларни тақиқлаши мумкинлигини билдирган. У сиёсий партиялар, касаба уюшмалари ва жамоат ташкилотларини зўравонликни очиқ қоралашга чақирган.

“Мамлакатга тартиб, вазминлик ва осойишталик керак, вазиятнинг янада кескинлашиши эмас”, дейди Макрон.

У ёшларнинг келажаги билан боғлиқ хавотирларини ҳам алоҳида тилга олган. Президентнинг айтишича, мактаб ўқувчилари ва талабалар таълим шароитлари, ҳаёт кечириш имкониятлари ҳамда жамиятда ўз ўрнини топиш борасида ташвиш билдирмоқда.

“Ёшларимиздан келажакка ишонишни талаб қилиб, уларга ечимларни ишлаб чиқиш ва муҳокамаларда иштирок этиш имконини бермаслигимиз мумкин эмас”, дейди у.

Макрон ҳукумат ёшлар, ўқитувчилар, касаба уюшмалари, иш берувчилар ва маҳаллий ҳокимият вакиллари билан биргаликда аниқ таклифлар ишлаб чиқишини маълум қилган.

Францияда президентлик сайловига олти ой қолганини эслатган Макрон сиёсий кураш кўчалардаги зўравонлик билан эмас, очиқ муҳокамалар орқали олиб борилиши кераклигини таъкидлаган.

“Франция муносиб президентлик сайловига лойиқ. Баҳслар сиёсий партиялар билан олиб борилиши керак, кўчаларда зўравонлик ва вайронгарчилик орқали эмас”, дейди у.

Эслатиб ўтамиз, аввалроқ Францияда бир неча кундан бери давом этаётган тартибсизликлар оқибатида қарийб 2,4 минг киши ҳибсга олингани, полиция ва жандармериянинг мингга яқин ходими жароҳатлангани ҳақида хабар берилган эди.