Бугун АҚШ ва Эрон ўртасида музокаралар бошланади – Трамп (видео)

АҚШ Президенти Дональд Трамп Эрон билан музокаралар бугун, 3 август куни бўлиб ўтишини маълум қилди. Бироқ у келишувга эришиш учун аниқ муддат белгилашдан бош тортди. Бу ҳақда у Нью-Жерсидан Вашингтонга қайтаётганда Air Force One бортида журналистлар билан суҳбат чоғида сўз очди.

Трамп аввалроқ Truth Social ижтимоий тармоғидаги саҳифасида Эрон ва Яқин Шарқдаги бошқа давлатлар Ҳормуз бўғозини қайта очиш ҳамда Теҳроннинг ядро дастури бўйича келишувни якунлаш учун қўшимча вақт сўраганини ёзганди.

Дам олиш кунларидан сўнг Вашингтонга қайтаётиб, Air Force One бортида журналистлар билан суҳбатлашган Трамп музокаралар бугун, 3 август куни тушдан кейин бошланишини айтган. Бироқ улар қаерда ўтиши ва унда кимлар иштирок этишига аниқлик киритмаган.

“Мен келишувга эришишни афзал кўрардим. Мен одамларни ўлдиришни истамайман, чунки урушда жуда кўп одам ҳалок бўлади. Биз буни хоҳламаймиз“, деган у.

Қайд этилишича, Трамп жорий йилнинг февраль ойи охиридан буён Исроил билан биргаликда Эронга нисбатан босимни кучайтириш билан таҳдид қилиб келмоқда. Шу билан бирга, у бир неча бор дипломатик музокаралар учун қўшимча вақт берган. Бу музокаралар эса ҳозиргача кенг қамровли келишув билан якунланмаган.

Исроил Энергетика вазири ва Хавфсизлик кабинети аъзоси Эли Коэннинг айтишича, Исроил ва АҚШ минтақадаги вазият бўйича хавфсизлик ҳамда разведка соҳасида яқин ҳамкорлик қилмоқда. Унинг сўзларига кўра, Эрон ядро дастурини қайта тиклаш ёки баллистик ракета дастурини ривожлантиришга уринса, Исроил келишув бор-йўқлигидан қатъий назар зарба беришга тайёр.

Эслатиб ўтамиз, аввалроқ Оқ уй раҳбари Дональд Трамп Яқин Шарқ мамлакатларининг илтимосига биноан Эронга бериладиган зарбаларни вақтинча тўхтатишга буйруқ берганини маълум қилган эди.