Бучадаги қирғинда Навальнийнинг қариндоши ҳам ўлдирилгани маълум бўлди

Россия қўшинларининг Буча шаҳрига (Украина) қилган ҳужумида россиялик мухолифатчи Алексей Навальнийнинг узоқ қариндоши Илья Навальний ҳам ўлдирилган. Бу ҳақда BBC News’га уларнинг қариндоши, Новое Залесье қишлоғи раҳбари Павел Навальний хабар берган.  

“Ҳа, Илья Алексейнинг узоқ қариндоши эди”, деган Павел Навальний. 

Унинг сўзларига кўра, Навальнийнинг бошқа, анча яқин қариндошлари Киев вилоятининг Россия томонидан босиб олиниши даврида ҳеч қандай зарар кўрмаган. 

Қайд этилишича, Илья Навальнийнинг жасади ёнидан унинг паспорти топилган. Мутахассислар унинг кўкрак ва бошида ўқ жароҳатлари борлигини аниқлаган. Унинг жасади Бучадаги черков яқинидаги қабрдан топилган.

Маҳаллий ҳокимият маълумотларига кўра, Бучада камида 400 киши ҳалок бўлган. Ҳозирда экспертлар ўлдирилганларнинг жасадларини оммавий қабрлардан олиб чиқмоқда.

“Буча қирғини” 

Жорий йилнинг 1 апрель куни Буча мэри Анатолий Федорук Украина ҳарбийлари россиялик босқинчиларни чиқариб юборганини тасдиқлади. Чекинган руслар фуқаролик иншоотларини, инфратузилма объектларини ва аҳоли пункти ичидаги баъзи ҳудудларни миналаган. 

Озод қилинган шаҳарда украиналик ҳарбийлар ҳудудни диверсантлар ва россиялик шериклардан тозалашга киришган. 

2 апрель оқшомида Украина Мудофаа вазири ўринбосари Анна Маляр бутун Киев вилояти рус босқинчиларидан озод қилинганини очиқлади. 

Шундан сўнг босқинчиларнинг ваҳшийликлари ҳақида маълумотлар пайдо бўла бошлади. Руслар одамларни ўлдирган ва зўрлаган, ҳақорат қилган ва қийноққа солгани айтилди. Дмитрий Комаров Бучадан даҳшатли кадрларни кўрсатди ва аҳоли нонни кўрганда шунчаки йиғлаётганини айтди. Кейинчалик тармоқда пайдо бўлган Бучадан олинган ҳайратланарли фотосуратларда боғланган одамлар ўлдираётгани маълум бўлди. Украиналиклар оммавий қабрларга дафн қилинган. Баъзи жасадлар кўчаларнинг ўртасида қолган. 

Буча воқеалари ҳақиқати ошкор бўлгач, дунё давлатлари уни қоралади. АҚШ ва Европа Иттифоқи Россияга қарши янги санкциялар пакетини ишлаб чиқишни бошлади. 

Россия Мудофаа вазирлиги Бучадаги воқеаларни Москвага қарши провокация ва саҳналаштирилган деб атади.