“Бу ўйинчоқми, болалар ўйиними?” Путин тинчлик келишуви ҳақида гапирди

Россия Президенти Владимир Путин Украинадаги урушни тугатиш бўйича барча таклифлар ҳали ҳам муҳокама учун очиқ эканини, бироқ Москва ўз манфаатларини ҳисобга олиши кераклигини билдирди. Бу ҳақда у кеча, 25 сентябрь куни журналистлар билан суҳбатда сўз очди.

Путиннинг айтишича, Россия ўтган ҳафтадаги парламент сайловларидан кейин Украина билан музокараларни қайта бошлашга тайёр бўлган, аммо Киев Москвага ҳамда сайлов участкаларига ҳужумлар уюштирган.

Россиянинг иккинчи йирик шаҳри Санкт-Петербургда журналистлар билан суҳбатда Путин провокацион ҳужумларни Украина бошлаганини ва энди Киев Россиянинг узоқ давом этадиган жавоб зарбаларини ҳис қилишини айтган.

“Буни улар бошлади. Ҳамма жойда, ҳар бир фронтда. Бу ўйинчоқми, болалар ўйиними?”, деган Путин Россия давлат телеканалларида намойиш этилган чиқишида.

“Шунинг учун улар Россиянинг жавоб зарбаларини ҳис қилиши ва ҳеч қандай провокацион ҳаракатлар, натижага эришиш учун вазиятни кескинлаштириш уринишлари иш бермаслигини тушуниши керак. Улар фақат ўзларининг аҳволини оғирлаштирмоқда”, деган у.

Украина Президенти Владимир Зеленский эса Россия ҳудудига қилинган ҳужумлар Украина фуқаролари ва инфратузилмасига берилган зарбаларга жавоб эканини айтган. Шу билан бирга, у урушни ҳал қилиш учун Россия билан тўғридан-тўғри музокаралар ўтказишга чақириб келмоқда.

Путин Россиянинг жавоб зарбалари Украина томонининг ўт очишни тўхтатиш ва музокараларни қайта бошлаш ҳақидаги чақириқларига сабаб бўлганини билдирган.

“Уларнинг барчаси стол устида. Ҳаммаси мумкин. Бироқ улар қилган барча ишлардан кейин биз жавоб сифатида нималар қилишимиз кераклигини ҳали ҳам яхшилаб ўйлаб кўришимиз керак”, деган Путин тинчлик бўйича таклифлар ҳақида.

Россия қўшинлари узоқ вақтдан бери Украина шаҳарларига, асосан тунда, зарбалар бериб келмоқда. Сўнгги ҳафталарда эса Киев ва бошқа шаҳарларга дронлар ва ракеталар билан кун бўйи давом этадиган ҳужумлар ҳам кучайган. Жумладан, кеча, 25 сентябрь куни Киевга берилган ҳаво зарбалари оқибатида 7 киши ҳалок бўлганди.

Украина ҳам бир неча ойдан бери Россия ҳудудидаги нишонларга кўплаб зарбалар бермоқда. Уларнинг асосий нишонлари нефть саноати объектлари ва ёқилғи сотиш шохобчалари бўлиб, айрим ҳужумлар Украина чегарасидан 3 минг километргача узоқликда амалга оширилган.

Путиннинг айтишича, Украинанинг янги музокаралар ўтказишга чақириқларига Киев ҳарбийларининг реактив дронларга қарши курашдаги қийинчиликлари ҳам сабаб бўлмоқда. Унинг таъкидлашича, бундай дронлар баландроқ баландликда учади ва уларни тутиб қолиш қийинроқ.

Россия Президенти июнь ойида Санкт-Петербургда халқаро конференция ўтказилаётган вақтда Украина томони шаҳарга оммавий ҳужумлар уюштирганини айтган. Унинг сўзларига кўра, Киев ўтган ҳафта Россия парламенти сайловларининг асосий кунида ҳам Москвага оммавий ҳужумлар қилган.

Путин Украина кучлари сайлов участкаларига ҳам ҳужум қилганини ва бу оқибатида бир нафар сайлов комиссияси ходими ҳалок бўлиб, бошқалар яраланганини билдирган. Шунингдек, Путин АҚШ Президенти Дональд Трамп ва Хитой раҳбари Си Цзиньпиннинг бу ҳафта Вашингтонда ўтказган музокараларига тўхталиб, Москва Вашингтон ва Пекин ўртасидаги “ижобий хусусиятга эга ҳар қандай келишув”ни олқишлашини айтган.

Россия раҳбарининг маълум қилишича, унинг Хитойда бўлиб ўтадиган бўлажак Осиё – Тинч океани иқтисодий ҳамкорлиги (АТЭС) саммитида иштирок этиши Россиядаги ички вазиятга боғлиқ бўлади.