“Bu o‘yinchoqmi, bolalar o‘yinimi?” Putin tinchlik kelishuvi haqida gapirdi

Rossiya Prezidenti Vladimir Putin Ukrainadagi urushni tugatish bo‘yicha barcha takliflar hali ham muhokama uchun ochiq ekanini, biroq Moskva o‘z manfaatlarini hisobga olishi kerakligini bildirdi. Bu haqda u kecha, 25 sentyabr kuni jurnalistlar bilan suhbatda so‘z ochdi.

Putinning aytishicha, Rossiya o‘tgan haftadagi parlament saylovlaridan keyin Ukraina bilan muzokaralarni qayta boshlashga tayyor bo‘lgan, ammo Kiyev Moskvaga hamda saylov uchastkalariga hujumlar uyushtirgan.

Rossiyaning ikkinchi yirik shahri Sankt-Peterburgda jurnalistlar bilan suhbatda Putin provokatsion hujumlarni Ukraina boshlaganini va endi Kiyev Rossiyaning uzoq davom etadigan javob zarbalarini his qilishini aytgan.

“Buni ular boshladi. Hamma joyda, har bir frontda. Bu o‘yinchoqmi, bolalar o‘yinimi?”, degan Putin Rossiya davlat telekanallarida namoyish etilgan chiqishida.

“Shuning uchun ular Rossiyaning javob zarbalarini his qilishi va hech qanday provokatsion harakatlar, natijaga erishish uchun vaziyatni keskinlashtirish urinishlari ish bermasligini tushunishi kerak. Ular faqat o‘zlarining ahvolini og‘irlashtirmoqda”, degan u.

Ukraina Prezidenti Vladimir Zelenskiy esa Rossiya hududiga qilingan hujumlar Ukraina fuqarolari va infratuzilmasiga berilgan zarbalarga javob ekanini aytgan. Shu bilan birga, u urushni hal qilish uchun Rossiya bilan to‘g‘ridan-to‘g‘ri muzokaralar o‘tkazishga chaqirib kelmoqda.

Putin Rossiyaning javob zarbalari Ukraina tomonining o‘t ochishni to‘xtatish va muzokaralarni qayta boshlash haqidagi chaqiriqlariga sabab bo‘lganini bildirgan.

“Ularning barchasi stol ustida. Hammasi mumkin. Biroq ular qilgan barcha ishlardan keyin biz javob sifatida nimalar qilishimiz kerakligini hali ham yaxshilab o‘ylab ko‘rishimiz kerak”, degan Putin tinchlik bo‘yicha takliflar haqida.

Rossiya qo‘shinlari uzoq vaqtdan beri Ukraina shaharlariga, asosan tunda, zarbalar berib kelmoqda. So‘nggi haftalarda esa Kiyev va boshqa shaharlarga dronlar va raketalar bilan kun bo‘yi davom etadigan hujumlar ham kuchaygan. Jumladanecha, kuni Kiyevga berilgan havo zarbalari oqibatida 7 kishi halok bo‘lgandi.

Ukraina ham bir necha oydan beri Rossiya hududidagi nishonlarga ko‘plab zarbalar bermoqda. Ularning asosiy nishonlari neft sanoati ob’ektlari va yoqilg‘i sotish shoxobchalari bo‘lib, ayrim hujumlar Ukraina chegarasidan 3 ming kilometrgacha uzoqlikda amalga oshirilgan.

Putinning aytishicha, Ukrainaning yangi muzokaralar o‘tkazishga chaqiriqlariga Kiyev harbiylarining reaktiv dronlarga qarshi kurashdagi qiyinchiliklari ham sabab bo‘lmoqda. Uning ta’kidlashicha, bunday dronlar balandroq balandlikda uchadi va ularni tutib qolish qiyinroq.

Rossiya Prezidenti iyun oyida Sankt-Peterburgda xalqaro konferensiya o‘tkazilayotgan vaqtda Ukraina tomoni shaharga ommaviy hujumlar uyushtirganini aytgan. Uning so‘zlariga ko‘ra, Kiyev o‘tgan hafta Rossiya parlamenti saylovlarining asosiy kunida ham Moskvaga ommaviy hujumlar qilgan.

Putin Ukraina kuchlari saylov uchastkalariga ham hujum qilganini va bu oqibatida bir nafar saylov komissiyasi xodimi halok bo‘lib, boshqalar yaralanganini bildirgan. Shuningdek, Putin AQSH Prezidenti Donald Tramp va Xitoy rahbari Si Szinpinning bu hafta Vashingtonda o‘tkazgan muzokaralariga to‘xtalib, Moskva Vashington va Pekin o‘rtasidagi “ijobiy xususiyatga ega har qanday kelishuv”ni olqishlashini aytgan.

Rossiya rahbarining ma’lum qilishicha, uning Xitoyda bo‘lib o‘tadigan bo‘lajak Osiyo – Tinch okeani iqtisodiy hamkorligi (ATES) sammitida ishtirok etishi Rossiyadagi ichki vaziyatga bog‘liq bo‘ladi.