“Бу мен ва Путиннинг иши”. Зеленский ҳудудлар масаласини ўзи ҳал қилишини айтди

Украина Президенти Владимир Зеленский ҳудудлар масаласини фақатгина Россия раҳбари Владимир Путин билан муҳокама қилиши кераклигини айтди. Бу ҳақда у Венгриянинг “Valasz Online” нашрига берган интервьюсида маълум қилди.

Унинг айтишича, ҳудудлар масаласи фақатгина Президентлар ўртасида ҳал бўладиган масала. Киев делегацияси эса гуманитар масалаларни муҳокама қилиши мумкин. Шу сабабдан, Украина йўқотилган ҳудудларни Россиянинг таркибига ўтган деб тан олишдан бош тортади.

“Менинг вазифам – ҳудудлар бўйича музокаралар олиб бориш. Бу масалада мен ўз позициямни фақат Россия Президенти Владимир Путин билан муҳокама қиламан”, деган Зеленский. 

Унинг сўзларига кўра, Россия-Украина музокараларида Киев делегациясининг Украина суверенитети ва ҳудудий яхлитлиги масаласини муҳокама қилиш ваколати йўқ.

Президент, шунингдек, Украина йўқотилган ҳудудларни дипломатик йўл билан қайтаришга интилиши ва бунинг учун “етарли хавфсизлик кафолатлари” олишни режалаштирганини айтган. 

Интервью давомида Зеленский яқин орада ўт очишни тўхтатиш мумкинлигини айтган, бироқ барқарор тинчлик фақат Путин устидан “ҳақиқий босим” ўрнатилгандагина амалга ошишини таъкидлаган. Хусусан, у АҚШни Россияга қарши санкциялар жорий қилишга чақирган.

Эслатиб ўтамиз, 4 июнь куни Россия Президенти Владимир Путин Украина билан юқори даражадаги музокаралар ўтказилмаслигини билдирганди.