“Бу мажбурий чора бўлган”. Жапаров Украина суверенитетини бузган Путинни оқлади

Қирғизистон Президенти Садир Жапаров Украина шарқидаги вазиятни одамлар қурбон бўлишига йўл қўймаслик учун музокаралар столида “фақат тинч дипломатик йўл билан” ҳал этиш тарафдори. Бу ҳақда у ижтимоий тармоқдаги саҳифасида ёзиб қолдирган.  

“Украина шарқидаги вазиятнинг ривожланишини хавотир ва чуқур ташвиш билан кузатяпман. Вазиятдан, жумладан, Донбасс атрофидаги вазиятнинг ривожланиши ҳақида доимо хабардор бўлдим. Минск келишувларининг талаблари бажарилмаслиги ҳозирги қийин вазиятга олиб келди”, деб ёзган Жапаров ўзининг Facebook’даги саҳифасида. 

У “можаронинг янада кучайишига йўл қўймаслик учун максимал эҳтиёткорлик ва вазминлик”га чақирган. 

“Қайд қилмоқчиманки, у ёки бу давлатни тан олиш ҳар қандай давлатнинг суверен ҳуқуқидир”, дея хулоса қилган Жапаров. 

Қирғизистон Президентининг таъкидлашича, “эҳтимол бу кўп сонли Россия фуқаролари истиқомат қиладиган Донбасс ҳудудларидаги тинч аҳолини ҳимоя қилишга қаратилган мажбурий чора бўлган”.

Эслатиб ўтамиз, 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади.

Путиннинг фавқулодда қарори ортидан АҚШ Президенти Жо Байден айрим шахсларнинг мулкини блоклаш ва айрим операцияларни тақиқловчи фармон қабул қилди. Ҳужжат ДХР ва ЛХРга сармоя киритишни, шунингдек, ушбу минтақалардан ҳар қандай товарлар, хизматлар ёки технологияларни Қўшма Штатларга импорт қилишни тақиқлайди.

Бундан ташқари, ушбу фармон ўзини мустақил деб эълон қилган республикаларда ҳаракат қилишга қарор қилган ҳар қандай шахсга нисбатан жазо чораларини қўллаш имконини беради.

Қўшма Штатларда жойлашган ёки кейинчалик АҚШга кирадиган, ДХР ва ЛХР билан боғлиқ шахсларга тегишли бўлган барча мулк ва мулкдаги улушлар блокланади.

Шунингдек, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.