Бу бандитлик – Эрдўған парламентдаги шармандали қасамёд ҳақида

Туркия Президенти Ражаб Тойиб Эрдўған мухолифат депутатлари томонидан жорий йилнинг 11 февраль куни янги Адлия вазири Акин Гурлекнинг қасамёдига тўсқинлик қилиш мақсадида парламент минбарини эгаллаб олишни бандитлик деб атади. У бу ҳақда кеча, 12 февраль куни ўзи раҳбарлигидаги “Адолат ва тараққиёт” партиясининг минтақавий бўлимлари раҳбарлари билан учрашувда сўз очди. 

“Вазирларимизнинг қасамёд қилишига тўсқинлик қилиш учун улар (мухолифат) ҳар хил жинояткорона усулларни қўлладилар, жумладан, халқ минбарини эгаллаб олдилар. Мен мухолифатнинг сиёсий институтга бўлган ишончни заифлаштирувчи, парламент обрўсига путур етказувчи ва халқимизни ҳақоратловчи ҳужумларини қоралайман ва рад этаман”, дейди Эрдўған.

Илгари хабар қилинганидек, Эрдўған Ички ишлар ва Адлия вазирликларининг янги раҳбарларини тайинлаш тўғрисидаги фармонни имзолаган эди. Улар лавозимга киришишдан олдин, конституцияга мувофиқ, парламентда қасамёд қилишлари шарт.

Асосий мухолифатдаги Халқ республикачи партияси (ХРП) 2025 йил март ойида коррупцияда айбланиб қамоққа олинган мегаполис мэри Экрем Имомўғлига нисбатан тергов бошлаган Адлия вазири, Истанбулнинг собиқ бош прокурори Гурлекнинг қасамёд қилишига йўл қўймаслигини билдирган.

Парламентдаги мажлис бошланишидан олдин ХРП вакиллари вазир қасамёд қилиши керак бўлган минбарни ўраб олди. Кейин жанжал чиқиб, оқибатда ҳукмрон партия депутатининг бурни синдирилди. У шифохонага жойлаштирилди. 

Парламент вице-спикери Бакир Бўздоғ бир неча бор парламент мажлисини тўхтатишга мажбур бўлди, Гурлек охир-оқибат қасамёд қилди. ХРП Адлия вазирлиги раҳбари томонидан қилинган қасамёдни ҳақиқий эмас деб эълон қилди.