Британияда уч қизнинг қотили 52 йилга қамалди

Ливерпуль Қироллик суди Аксел Рудакубанани Саутпорт шаҳри чеккасида уч ёш қизни ўлдирганликда айблаб, 52 йиллик қамоқ жазосига ҳукм қилди. Бу ҳақда кеча, 23 январь куни Буюк Британия Бош прокуратурасига таяниб, BBC хабар берди.

Рудакубана қизларни ўлдиришдан ташқари яна 13 та жиноятда айбдор деб топилди. Хусусан, бу яна ўн кишини, жумладан саккиз болани ўлдиришга уриниш, шунингдек, рицин ишлаб чиқариш ва “Ал-Қоида” террорчилик ташкилоти учун ўқув қўлланмасини сақлашдир.

Жорий йилнинг 20 январь куни ҳодиса юзасидан суд жараёни бўлиб ўтди. Ҳукм эълон қилинишига марҳума қизларнинг 40 га яқин қариндоши йиғилган. Ўсмир ўзига қўйилган барча айбловларни тан олди. Бироқ Рудакубана болалар рақс клубига ҳужумдан кўп ўтмай, қилган ишлари билан мақтангани маълум бўлди. Хусусан, у бу болалар ўлганидан жуда хурсанд эканини айтди ва қурбонлардан бири етти ёшга тўлмаганига аҳамият бермаслигини таъкидлади.

Айбланувчи, келиб чиқиши руандалик ўсмир жиноят содир этган вақтда 17 ёшда бўлгани сабабли, у тўлиқ жазо ололмайди. Шунинг учун суд уни тайинлаш учун мумкин бўлган 52 йилдан тергов давомида ҳибсда бўлиш муддатини олиб ташлаб, 51 йил 190 кунга озодликдан маҳрум қилди. Судьянинг сўзларига кўра, йигитнинг қачонлардир озод этилиши даргумон.

Саутпортдаги Лейбористлар депутати Патрик Херли давлат прокуратураси директоридан ҳукмни “асоссиз даражада енгил жазо” деб қайта кўриб чиқишни сўради ва жазонинг етарли даражада оғир эмаслигини таъкидлади.

“Бугун чиқарилган ҳукм етарлича оғир эмас, содир этилган жиноятлар учун жазо етарлича узун эмас. Қурбонлар ва уларнинг оила аъзолари учун даҳшатли тушдек бўлган бу жиноятнинг оғирлигини акс эттирувчи ҳукм керак. Мен Бош прокурорга ҳукмни қайта кўриб чиқиш сўрови билан мурожаат қилдим”, деган депутат.

Маълумот учун, жиноятчи 2024 йилнинг 29 июль куни Hart Space Studious болалар рақс студиясига пичоқ билан ҳужум қилганди. Ҳужум оқибатида уч қиз ҳалок бўлганди. Қўшни Бэнкс шаҳрида яшовчи 17 ёшли ўсмир Аксел Рудакубана ҳужумда гумонланиб ҳибсга олинганди. Август ойида у 18 ёшга тўлди.

Эслатиб ўтамиз, болалар студиясига қилинган ҳужумдан сўнг 31 июль куни Британиянинг Саутпорт шаҳрида ўнг қанот экстремистлар тартибсизлик келтириб чиқарганди ва оқибатда 39 нафар полициячи жароҳат олганди. Улардан 27 нафари шифохонага ётқизилганди.