Британияда 16 ёшгача бўлганларга энергетик ичимлик сотиш тақиқланиши мумкин

Буюк Британияда 16 ёшгача бўлган болаларга ўзида юқори миқдорда кофеин сақловчи энергетик ичимликларни сотиш тақиқланиши мумкин. Бу ҳақдаги режа ҳукумат сайтида эълон қилинди.

Соғлиқни сақлаш ва ижтимоий таъминот вазирлигининг маълумотига кўра, Буюк Британияда ҳар куни 100 мингга яқин бола камида битта шундай ичимлик истеъмол қилади. Тадқиқотлар энергетиклар уйқу бузилиши, хавотир, диққатнинг пасайиши ва семириш билан боғлиқлигини кўрсатган. Ҳозирги ёрлиқларда “болаларга тавсия этилмайди” деган огоҳлантириш бор, аммо янги чоралар бу ичимликларни болаларга сотишни барча жойларда – дўконларда, кафе ва ресторанларда тақиқлайди.

Мамлакат Соғлиқни сақлаш ва ижтимоий таъминот вазири Уэс Стритинг бу чораларни шошилинч равишда қабул қилиш кераклигини айтган. 

“Болалардан ўқишда ютуқлар кутишимиз мумкин эмас, агар уларнинг организмида ҳар куни тўрт банка колага тенг кофеин бўлса. Энергетик ичимликлар зарарсиздек туюлиши мумкин, лекин улар болаларнинг уйқуси, диққат-эътибори ва аҳволига салбий таъсир қилади, юқори шакарли турлари эса тишларни бузади ва семиришга олиб келади”, деган вазир. 

Ушбу ташаббус ҳукуматнинг “Ўзгаришлар режаси” доирасида амалга оширилмоқда. Режа даволашдан кўра профилактикага ўтиш ва узоқ муддатли соғлиқни сақлаш кўрсаткичларини яхшилашга қаратилган. Ҳукумат ҳисоб-китобларига кўра, тақиқ 40 мингга яқин болада семиришнинг олдини олиши ва соғлиқ учун ўнлаб миллион фунт фойда келтириши мумкин.

Таълим вазири Бриджет Филлипсон бу қарорни дарслардаги интизомни яхшилаш билан боғлаган. 

“Бу кўплаб болаларнинг ўқишини сусайтиради. Бугунги қарор бу муаммони ҳал қилиш йўлидаги навбатдаги қадамлардан биридир”, деган вазир. 

Жорий йилнинг 2 сентябрь куни бошланган муҳокама 12 ҳафта давом этади ва соғлиқни сақлаш мутахассислари, ўқитувчилар, чакана савдо вакиллари, ишлаб чиқарувчилар, назорат органлари ва жамоатчилик фикрларини қамраб олади.

Кўплаб йирик сотувчилар аллақачон бундай ичимликларни сотишни чеклаган, бироқ кичик дўконлар ҳануз болаларга энергетик ичимликлар сотишда давом этмоқда. Шу сабабли миллий даражада ягона ёндашувни жорий этиш талаблари кучайган.

Таклиф ота-оналар, ўқитувчилар, тиббиёт мутахассислари ва фаоллар томонидан кенг қўллаб-қувватланмоқда. Қироллик педиатрия ва болалар саломатлиги коллежи тақиқни “болалар саломатлигини мустаҳкамлашдаги кейинги қадам” дея баҳолаган.

Агар тасдиқланса, тақиқ 1 литрда 150 миллиграммдан ортиқ кофеин бўлган барча ичимликларга татбиқ этилади. У кам кофеинли газсиз ичимликлар, чой ва қаҳвага тааллуқли бўлмайди.

Эслатиб ўтамиз, аввалроқ Қримда 8-синф ўқувчиси энергетик ичимлик ичганидан кейин юраги тўхтаб қолганди. Шундан кейин у шифохонага ётқизилган ва у ерда комага тушиб қолган. Шифокорлар унга номаълум модда билан заҳарланиш ташхисини қўйганди.