Британия Россиянинг музлатилган активларини қайтармоқчи эмас

Буюк Британия Россия Федерациясининг музлатилган давлат активларини Москва Украинага етказилган зарар учун товон тўлашга рози бўлмагунча қайтармайди. Бу ҳақда кеча, 25 май куни Британия расмийларига таяниб, “The Guardian” нашри хабар берди. 

Унинг сўзларига кўра, Буюк Британия расмийлари Европа Иттифоқидаги ҳамкасблари билан биргаликда Россия давлат активларини мусодара қилиш имкониятини муҳокама қилмоқда, бироқ бу масала бўйича ҳали қарор қабул қилинмаган. Ҳукмрон Консерватив партиянинг айрим аъзолари, мухолифатдаги Лейбористлар партияси вакиллари ва Украина ҳукумати ўтган йили 26 миллиард фунт стерлингга (жорий курс бўйича 32 миллиард доллар) баҳоланган Россиянинг Буюк Британиядаги активлари тўлиқ мусодара қилиниши ва можародан кейин мамлакатни тиклаш учун уларни тўғридан-тўғри Киевга ўтказиш тарафдори.

Шу билан бирга, нашр таъкидлаганидек, Ғарбда муқобил, "юридик нуқтаи назардан камроқ хавфли" стратегия тобора оммалашиб бормоқда, унга кўра, Россия Федерацияси Украинага компенсация тўлашга рози бўлгунга қадар Ғарб давлатлари Россия активларини ушлаб туради. “The Guardian”нинг қўшимча қилишича, Британия ҳукумати халқаро молия тизимини фалаж қиладиган ва Буюк Британияга қарши чора-тадбирларни қўзғатувчи прецедент яратишдан қўрқиб, Россия Федерацияси Марказий банкининг қиролликда жойлаштирилган маблағларини экспроприация қилиш мажбуриятини олишдан бош тортмоқда.  

Жорий йилнинг 23 май куни Британия парламенти Жамоалар палатасининг Халқаро алоқалар қўмитаси экспертлар даражасида Украинани урушдан кейинги реконструкция қилиш масаласини муҳокама қилди. Оксфорд университетининг халқаро оммавий ҳуқуқ профессори, халқаро оммавий ҳуқуқ бўйича мутахассис Антониос Цанакопулоснинг таъкидлашича, Россия давлат активларини мусодара қилиш, уларни музлатишдан фарқли ўлароқ, халқаро ҳуқуқнинг бузилиши бўлади, чунки Россия Федерациясининг суверен активлари иммунитетга эга. Шу билан бирга, унга кўра, Россия активларини музлатиш ҳақидаги қарор вақтинчалик бўлиши керак.

Буюк Британия ташқи ишлар вазири ўринбосари Лео Дочерти 18 май куни Буюк Британия ва унинг иттифоқчилари Россия Федерациясининг музлатилган маблағларини миллий қонунчилик ва халқаро ҳуқуқ нормаларига риоя қилиш учун Украинага ўтказиш ғоясини ўрганаётганини айтди. Унинг эслатишича, “Еттилик” давлатлари етакчиларининг февраль ва апрель ойларида эълон қилинган қўшма баёнотларида Украина ҳудудий яхлитлиги тикланмагунча Россия музлатилган активлардан фойдалана олмаслиги айтилган.