Британия чегара устидан назорат йўқолганини тан олди 

Британия Ички ишлар вазири Шабана Маҳмуд миграция инқирози ортида мамлакат ўз чегаралари устидан назоратни йўқотганини тан олди. Бу ҳақда у бугун, 15 октябрь куни Лондонда Британия, Европа Иттифоқи ва Ғарбий Балқон давлатлари вакилларининг ноқонуний миграцияга қарши кураш масалалари бўйича учрашувида сўз очди.

Шабана Маҳмуднинг билдиришича, агар сиёсатчилар чегаралар устидан назоратни тиклай олмаса, Европа давлатларида жамоатчиликнинг ҳукуматга бўлган ишончи жиддий равишда пасайиши мумкин.

“Financial Times” нашрининг ёзишича, Британия Ички ишлар вазирининг бу баёноти кейинги ойларда сўровларда етакчилик қилаётган Найжел Фараж раҳбарлигидаги “Буюк Британияни ислоҳ қилиш” ўнг партиясининг оммавий қўллови фонида берилган. Шу сабабли ҳокимиятдаги лейбористлар ҳукумати миграция масаласида ўз позициясини кескинлаштиришга ҳаракат қилмоқда.

Қайд этиш жоиз, ноқонуний муҳожирлар кўп ҳолларда Британияга етиб бориш ва қочқин мақомини олиш учун ҳар қандай имкониятдан фойдаланмоқда. Бу мақом уларга молиявий ёрдам ва ижтимоий дастурлардан фойдаланиш имконини беради. 2024 йилда 36,8 мингдан ортиқ ноқонуний муҳожир Ла-Манш бўғози орқали қайиқларда Британияга келган. Бу ўтган йилга нисбатан чоракка кўп. Рекорд кўрсаткич 2022 йилда қайд этилган бўлиб, ўшанда мамлакатга 45,7 мингдан зиёд муҳожир кириб келган. Британия ҳукумати ҳар куни минглаб фунт стерлинг сарфлаб, бошпана сўровчиларини меҳмонхоналарда жойлаштирмоқда.

Миллий статистика бошқармаси маълумотларига кўра, 2023 йил июнидан 2024 йил июнигача мамлакатга келган мигрантлар соф оқими 728 минг кишини ташкил этган. Бир йил аввал бу кўрсаткич 906 мингни ташкил этган бўлса, Британия ЕИдан чиқишидан аввал йиллик кўрсаткич тахминан 250 минг атрофида бўлган.

Эслатиб ўтамиз, аввалроқ АҚШ Ички хавфсизлик департаменти 2024 йилнинг октябридан жорий йилнинг сентябригача бўлган даврда АҚШ чегарачилари АҚШ-Мексика чегарасини ноқонуний кесиб ўтишга уриниш билан боғлиқ деярли 238 мингта ҳолатни қайд этгани ҳақида хабар берган эди. Бу 1970 йилдан бери энг паст кўрсаткич бўлиб, ўшанда тахминан 202 мингта шундай уриниш қайд этилган.

Моҳичеҳра Қадамова