Бразилияликлар АҚШдаги майдон сифатидан шикоят қилди

Бразилия терма жамоаси футболчилари 2026 йилги Жаҳон чемпионатидаги илк ўйиндан сўнг АҚШнинг Шарқий Рутерфорд шаҳридаги “Метлайф” стадионидаги майдон ҳолатидан норозилик билдирди. Бу ҳақда UOL нашри хабар берди. 

“Доимий иссиқлик сабаб майса тез қуриб қолмоқда ва бу ўйин суръатини секинлаштиряпти. Биз ритмга кира олмаяпмиз. Тўпни тез айлантирмоқчимиз, лекин майдон бунга халақит бермоқда. Шунга қарамай, биз мослашишимиз керак, чунки бутун турнир давомида шундай шароит бўлиши мумкин”, дейди терма жамоа ҳужумчи Винисиус Жуниор.

Шунингдек терма жамоа ярим ҳимоячи Бруно Гимараес ҳам майдон ҳолатига тўхталиб ўтган.

“Бу баҳона эмас, лекин майдон жуда қуруқ эди. Мослашмагунимизча кўп хатоларга йўл қўйдик ва ўйин бошини мураккаблаштирдик. Биз бундай даражада кўп хато қилишга йўл қўя олмаймиз”, дейди у.

Турнирнинг очилиш ўйинида Бразилия Марокаш билан 1:1 ҳисобида дуранг ўйнади. Бош мураббий Карло Анчелотти натижадан норози эканини билдирган.

Ҳозирда Бразилия “C” гуруҳида 3-ўринни эгаллаб турибди. Жорий йилнинг 20 июнь куни 2-турда Карло Анчелотти шогирдлари Гаитига қарши майдонга тушади, 3-турда эса 25 июнь куни Шотландия билан куч синашади.