Бразилияда талабалар автобуси ҳалокатга учради. Қурбонлар бор

Кеча, 21 февраль куни Бразилияда талабаларни олиб кетаётган автобуснинг юк машинаси билан тўқнашиб кетиши оқибатида 12 киши ҳалок бўлди. Бу ҳақда G1 хабар берди.

Маълум қилинишича, ушбу бахтсиз ҳодиса мамлакатнинг Сан-Паулу шаҳрида юз берган. Тўқнашув юк машинаси ҳайдовчисининг бошқарувни йўқотиб қўйиши туфайли содир бўлган. Эркак воқеа жойидан қочиб, полициячилардан яширинган. Кейинроқ ҳибсга олиниб, шифохонага олиб кетилган.

Қайд этилишича, талабаларни олиб кетаётган автобусда 30 киши бўлган. Бахтсиз ҳодисадан кейин автобуснинг чап томони бутунлай вайрон бўлган. Дастлабки маълумотларга кўра, 19 киши жароҳат олган ва 12 киши ҳалок бўлган.

“Талабаларнинг баъзилари бу йил ўқишни бошлаган, баъзилари учун дарснинг учинчи куни эди”, дейилади хабарда.

Ушбу ҳодисадан сўнг, университетда уч кунлик расмий мотам эълон қилинган ва дарслар тўхтатилган.

Нашрга кўра, фуқаролик полицияси автоҳалокат сабабини аниқлаш учун тергов бошлаган.

Эслатиб ўтамиз, жорий йилнинг 7 февраль куни Бразилиянинг Сан-Паулу шаҳрида самолёт ичида йўловчилари бўлган автобус устига қулаб тушганди. Ҳажми кичик бўлган King Air F90 самолёти Сан-Паулуда фавқулодда қўнишга уриниб кўрган, аммо у қўнишни амалга оширолмай, автомобиль йўлига қулаб тушган. Ҳодиса оқибатида икки киши ҳалок бўлганди.