Бойларга алоҳида солиқ солиниши мумкин. Қозоғистонда!

Қозоғистон Президенти Қосим-Жўмарт Тўқаев йирик мулк эгалари учун юқорироқ солиқ ставкасини жорий этиш масаласини кўриб чиқишни таклиф қилди. Бу ҳақда у бугун, 28 октябрь куни халққа қилган мурожаатида гапирди.

Тўқаев солиққа тортишда адолат тамойилига тўхталиб, йирик мулк эгалари учун оширилган ставкани жорий этишни муҳокама қилиш вақти келганини айтган.

“Ҳеч ким қонуний йўл билан орттирилган активларни қандайдир тарзда чекламоқчи эмас. Бу Конституцияга зид бўларди. Гап адолат ҳақида кетмоқда”, дейди у.

Президентнинг айтишича, ҳар бир фуқаро мамлакат тараққиётига ўз имкониятига яраша ҳалол ҳисса қўшиши лозим. Шу муносабат билан у ҳукумат ва Қурултойга масалани ўрганиб чиқиш ҳамда таклифлар киритишни топширган.

Тўқаев адолатли солиқ тизими шаффофлик ва тўлиқ рақамлаштиришни талаб қилишини билдирган. Шунингдек, солиқ тушумларини ошириш, яширин иқтисодиётни қисқартириш ва коррупция хавфини камайтириш учун сунъий интеллект каби илғор технологиялардан фойдаланиш зарурлигини айтган.