БМТ судьяси ёш аёлни қулликка мажбурлади

Оксфорд қироллик суди БМТ Халқаро суди судьяси Лидия Мугамбени угандалик ёш аёлни қуллик меҳнатига мажбурлашда айбдор деб топди. Бу ҳақда “The Independent” хабар берди.

Маълум қилинишича, Уганда Олий судининг ҳам судьяси бўлган 49 ёшли Мугамбе Уганда олий комиссари ўринбосари Жон Леонард Мугерва билан ёш аёлнинг Буюк Британияга келишини ташкиллаштириш учун “ноқонуний тил бириктирган”.

Терговда аниқлик киритилишича, Мугамбе ёш қизни Буюк Британияда бепул ишлашга ва болаларига қарашга мажбурлаган, унинг ҳуқуқий саводсизлигидан фойдаланиб, мамлакатга келиш мақсади ҳақида ёлғон гапирган.

Суд ҳужжатларига кўра, Мугамбе “ўз ҳаётини энг кам харажатлар билан енгиллаштириш учун кимнидир қўлга киритишни” хоҳлаган. Буюк Британияга кўчиб ўтгандан сўнг, исми ошкор этилмаган Уганда фуқароси том маънода қулликка тушиб қолган. Прокурорларнинг таъкидлашича, Мугамбе ўз мавқеидан фойдаланган ва жабрланувчига доимий ишга жойлашишга рухсат бермаган.

Мугамбе айбловларни рад этиб, қизга меҳр ва ғамхўрлик билан муносабатда бўлганини даъво қилган.

Кеча, 13 март куни Мугамбе бир нечта айбловлар бўйича айбдор деб топилди: Буюк Британия иммиграция қонунини бузиш, эксплуатация қилиш, мажбурий меҳнат ва гувоҳни қўрқитиш мақсадида саёҳатни ташкил қилиш.

Халқаро суд веб-сайтидаги судьяларнинг профилига кўра, Мугамбе 2023 йил май ойида ушбу органнинг судьялари рўйхатига киритилган.