БМТ Хавфсизлик Кенгаши ҳусийлардан ҳужумни тўхтатишни талаб қилмоқда

Бирлашган Миллатлар Ташкилоти Хавфсизлик Кенгаши Ямандаги ҳусийларнинг Қизил денгиздаги кемаларга ҳужумларини зудлик билан тўхтатишга чақирди. Бу ҳақда халқаро ташкилотнинг резолюцияси қабул қилинди. 

Кеча, 10 январь куни Япония ва АҚШ томонидан киритилган тегишли резолюция Нью-Йоркда ўн бир овоз билан қабул қилинди. Ҳеч ким қарши овоз бермади. Тўрт давлат – Россия, Хитой, Жазоир ва Мозамбик бетараф қолди. 

“Овоз бериш бир неча соатга кечиктирилди, чунки Россия бир нечта тузатишлар киритди, уларнинг барчаси рад этилди”, дея аниқлик киритмоқда DPA агентлиги.

Резолюцияда ҳусийларнинг Қизил денгиздаги савдо кемаларига қилган ҳужумлари кескин қораланади. Исроил ва ҲАМАС ўртасида уруш бошланганидан бери кескин ортган ракета ва дрон ҳужумлари халқаро савдо, денгиз қонунчилиги ва минтақадаги тинчликка зарар етказмоқда. Резолюцияда айтилишича, ҳужумлар “зудлик билан” тўхтатилиши керак.

Шу билан бирга, ҳусийлар ноябрь ойида мусодара қилинган Galaxy Leader кемасини экипажи билан бирга қўйиб юборишга чақирилади. АҚШ маъмуриятининг маълумотларига кўра, 2023 йил октябрь ойидан бери Эрон томонидан қўллаб-қувватланадиган ҳусийлар Қизил денгизда юздан ортиқ учувчисиз самолётлар ва ракета ҳужумларини уюштирган. 

Қизил денгиз марказий савдо йўли бўлиб, у орқали жаҳон савдосининг ўн икки фоизи ўтади. Сувайш канали Ўртаер денгизи ва Қизил денгизларни боғлаб, Осиё ва Европа ўртасидаги энг қисқа денгиз йўлига айланади. Африка жанубидаги Яхши умид бурни атрофидаги муқобил йўл транспорт вақтини сезиларли даражада оширади.

Яман Қизил денгиз ва Адан кўрфази ўртасидаги Боб ал-Мандеб бўғозида жойлашган. Хавфли вазият туфайли йирик юк ташиш компаниялари Қизил денгиз ва Сувайш канали орқали ўтадиган маршрутдан кўпроқ қочмоқда. Тижорий юк ташишни ҳимоя қилиш учун Қўшма Штатлар декабрь ойида халқаро ҳарбий коалиция тузди.