Биз келишувни бузишдан манфаатдор эмасмиз – ҲАМАС 

Фаластиннинг ҲАМАС ҳаракати Ғазо секторида ўт очишни тўхтатиш келишувини бузишдан манфаатдор эмас. Бу ҳақда ҳаракат вакили Абдель Латиф ал-Кануа маълум қилди.

Унинг айтишича, ҲАМАС сулҳнинг бузилиши эмас, аксича, Исроил барча қоидаларга риоя қилиши тарафдори.

“Биз ўт очишни тўхтатиш бўйича келишувни бузишдан манфаатдор эмасмиз. Биз унинг бажарилишини ва Исроил унинг барча қоидаларига риоя қилишини таъминлаш тарафдоримиз”, деган у.

Ал-Кануанинг таъкидлашича, воситачилар ҳозирда Исроил ҳукумати келишувнинг гуманитар протоколини бажаришини таъминлашга ҳаракат қилмоқда. Қолаверса, гаровга олинганларни алмаштириш ҳам яқин орада яна қайта бошланади.

ҲАМАС вакилининг қайд этишича, ҳаракат делегацияси айни пайтда Қоҳирада келишув устида иш олиб бормоқда.

“Улар Исроил келишувни амалга ошириш йўлида яратаётган тўсиқларни енгиб ўтишга ҳаракат қилмоқда”, деган ҲАМАС вакили.

Маълумот учун, 2025 йилнинг 16 январь куни Исроил, ҲАМАС, АҚШ ва Қатар вакиллари Доҳада Ғазо секторида гаровга олинганларни озод қилиш ва ўт очишни тўхтатиш бўйича келишувни расман имзолаганди. Келишув 19 январь куни кечқурун кучга кирди ва ҲАМАС уч нафар шахсдан иборат биринчи асирлар гуруҳини озод қилди. Исроил эса 90 фаластинлик маҳбусни озод қилган.

Эслатиб ўтамиз, ҳафта охирида Исроил ва ҲАМАС ўртасида бўлиб ўтиши керак бўлган маҳбуслар алмашинуви Исроил ўт очишни тўхтатиш келишуви бўйича ўз мажбуриятларини бажармагани учун кейинга сурилганди. Кейин эса АҚШ Президенти Дональд Трамп ҲАМАС ҳаракатидан барча исроиллик гаровга олинганларни 15 февраль куни тушгача озод қилишни талаб қилганди. Трамп ўз нутқи давомида ўт очишни тўхтатиш тўғрисидаги келишувни бекор қилиш ва “жаҳаннам”ни бошлаш вақти келганини айтганди.  Шундан сўнг, Исроил Бош вазири Биньямин Нетаньяху ҲАМАС ҳаракати жорий йил 15 февраль куни тушгача гаровга олинганларни озод қилмаса, Исроил Ғазо секторида жанговар ҳаракатларни қайта бошлаши ҳақида гапирганди.