Биз Исроилнинг асл қиёфаси очилаётганини кўряпмиз – Ҳоқон Фидан

Туркия Ташқи ишлар вазири Ҳоқон Фидан халқаро ҳамжамиятнинг Исроилга нисбатан позициясида ўзгаришлар борлигини кўраётганини, бироқ унга босим ҳануз етарли эмаслигини айтди. Бу ҳақда у бугун, 12 сентябрь куни Римда Италия Ташқи ишлар вазири Антонио Таяни билан ўтказилган матбуот анжуманида сўз очди.

“Халқаро ҳамжамиятнинг Исроилга кўрсатаётган босими етарлими? У етарли эмас. Бугунги кунда Ғазода очлик туфайли юзага келган геноцид давом этмоқда. Исроилнинг экспансионизми ва минтақадаги таҳдидлар ортмоқда. Бу эса халқаро босим етарли эмаслигини, у тўсқинлик қила олиш даражасига етмаганини англатади. Шунга қарамай, биз халқаро ҳамжамиятда Исроилга нисбатан муносабатда сезиларли уйғонишни кўряпмиз, гарчи кечиккан бўлса-да”, дейди Фидан

Унинг сўзларига кўра, халқаро ҳамжамият кўпроқ иш қилиши керак, хусусан, Европа Иттифоқи, бошқа давлатлар ва Бирлашган Миллатлар Ташкилоти Исроилни тўхтатиш учун янада оқилона қарорлар қабул қилиши лозим.

“Биз Исроил халқаро ҳамжамият кўзида йиллар давомида яратган иллюзиянинг аста-секин сўнаётганини кўряпмиз. Биз унинг асл қиёфаси ва асл ниятлари очилаётганини кўряпмиз. Бутун дунё инсоният учун муқаддас бўлган барча қоидалар бирин-кетин бузилиб, емирилиб бораётганини кўриб турибди”, дейди вазир.

Эслатиб ўтамиз, Туркия Буюк Миллат Мажлиси (ТБММ) Бош Ассамблеяси Исроилнинг Ғазо секторидаги ишғолини кенгайтириш қарори ва Фаластин халқига қарши амалга ошираётган геноцид билан боғлиқ қарорни тасдиқлаганди. Тегишли қарор Туркия парламенти спикери Нуман Куртулмуш томонидан кўриб чиқиш учун таклиф қилинган.

Шунингдек, олдинроқ Туркия Ташқи ишлар вазири Хоқон Фидан мамлакат Исроил билан барча иқтисодий ва савдо муносабатларини тўхтатгани ҳамда ўз ҳаво ҳудудини Исроил самолётлари учун ёпганини маълум қилганди. Фиданнинг сўзларига кўра, Исроил икки йилдан бери Ғазода “геноцид” содир этиш билан бир пайтда халқаро ҳуқуқни қасддан бузиб келмоқда. Туркия ўзига ҳамфикр бўлган давлатларни Исроилга қурол-яроғ етказиб беришни тўлиқ тўхтатиш ва савдони бутунлай узишга чақирмоқда.