Бир ўйинда 4 та рекорд: Месси Гиннессга кирди

Аргентина терма жамоаси сардори Лионель Месси 2026 йилги Жаҳон чемпионати гуруҳ босқичининг иккинчи турида Австрияга қарши учрашувда (2:0) дубль қайд этиб, бир вақтнинг ўзида бир нечта жаҳон рекордларини янгилади. Унинг ушбу ютуқлари расман Гиннесс рекордлар китобига киритилди. 

Австрия дарвозасига урилган икки гол Мессининг Жаҳон чемпионатларидаги умумий голлари сонини 18 тага етказди. Шу тариқа, у Германия терма жамоасининг собиқ ҳужумчиси Мирослав Клозега тегишли бўлган 16 голлик рекордни ортда қолдириб, мундиаллар тарихидаги энг яхши тўпурарга айланди.

Шунингдек, Мессининг Австрияга қарши ўйини қуйидаги ректорлар бўйича уни Гиннесс рекордлар китобига киритди:

• Жаҳон чемпионатлари тарихидаги энг кўп гол – 18 та;
• Жаҳон чемпионатларидаги энг кўп ўйин – 28 та;
• Жаҳон чемпионатларидаги энг кўп ғалаба – 18 та;
• Жаҳон чемпионатларида энг кўп дақиқа майдонда ҳаракат қилган футболчи – 2489 дақиқа.

Месси яна бир қатор тарихий натижаларни ҳам қайд этди. У XXI асрда кетма-кет олтита Жаҳон чемпионатида майдонга тушган илк футболчига айланди.

Шунингдек, аргентиналик юлдузнинг Жаҳон чемпионатларидаги гол ва голли узатмалари сони 26 тага етди. Бу кўрсаткич билан у Бразилия футболи афсонаси Пелега тегишли бўлган 21 голлик натижани ортда қолдирди.

Месси, шунингдек, бразилиялик Ривелинонинг қарийб 60 йил давомида сақланиб келган тарихий натижаларидан бирини ҳам такрорлади.

Бироқ Австрияга қарши учрашув у учун нохуш рекорд билан ҳам ёдда қолди. Ўйиннинг 9-дақиқасида пенальтини аниқ амалга ошира олмаган Месси Жаҳон чемпионатлари тарихида энг кўп пенальтидан фойдалана олмаган футболчига айланди. Бу унинг мундиаллардаги учинчи ноаниқ пенальтиси бўлди ва мазкур кўрсаткич бўйича янги антирекорд ўрнатилди.

Эслатиб ўтамиз, аввалроқ Мирослав Клозе Мессининг тарихий рекорди ҳақида фикр билдириб, уни барча даврларнинг энг яхши футболчиси деб атаган эди.