“Бетис” бош мураббийи футболга янги қоидани жорий этишни таклиф қилди

Европа лигасининг 4-турида “Бетис”нинг Франция клуби “Лион” устидан 2:0 ҳисобида ғалаба қозонган ўйиндан сўнг, 72 ёшли чилилик мутахассис Мануэль Пеллегрини баскетболдан илҳомланган ҳолда футболга янги қоидани жорий этишни таклиф қилди. Бу ҳақда “L’Équipe” нашри хабар берди.

Пеллегринининг фикрича, футболни янада динамик ва ҳужумга йўналтирилган ўйин шаклига айлантириш учун тўп майдон ярим чизиқни кесиб ўтганидан кейин жамоаларга уни орқага, ўз ярмига қайтаришни тақиқлаш керак.

“Менимча, футболни янада жадалроқ қилиш учун айрим қоидаларни ўзгартириш мумкин. Масалан, тўп ярим чизиқни босиб ўтгач, уни ўз ярмига қайтаришни тақиқлаш керак. Бу ўйинни тезлаштиради ва жамоаларни рақиб дарвозасига яқинроқ ўйнашга мажбур қилади”,  дейди Пеллегрини “L’Équipe” нашрига.

У шунингдек, ҳозирги офсайд қоидаси ўзгартирилмаслиги кераклигини, VAR туфайли бу борада хатоларга йўл қўйиш эҳтимоли камайганини таъкидлади.

“Офсайд қоидаси ҳозирда тўғри ишлаяпти. Уни ўзгартириш кераксиз таваккалчилик бўларди. VAR туфайли адолатсиз қарорлар сони камайди”, дея қўшимча қилди у.

Маълумот учун, Пеллегрини мураббий сифатида  “Ривер Плейт”, “Вильярреал”, “Малага”, “Реал Мадрид” ва “Манчестер Сити” каби клубларда фаолият юритган. Унинг қўл остида “Бетис” 2021-2022 йилги мавсумда Испания Қирол кубогини қўлга киритган.