Бернэмнинг илк хорижий меҳмони ким бўлиши айтилди

Буюк Британиянинг янги Бош вазири Энди Бернэм бугун, 27 июль куни Украина Президенти Владимир Зеленскийни ўзининг илк хорижий меҳмони сифатида қабул қилади. Бу Лондоннинг Украинага қатъий қўллаб-қувватловини яна бир бор намоён этади. Бу ҳақда Бош вазир матбуот хизмати хабар қилди.

Даунинг-стрит маълумотига кўра, икки давлат раҳбари денгиз ҳарбий базасида учрашиб, Буюк Британия бошчилигидаги тайёргарлик дастурлари Украина Қуролли кучларини мустаҳкамлаш ва жанг майдонида натижа беришга қандай ҳисса қўшаётгани билан танишади.

“Буюк Британия Украина билан елкама-елка турибди ва бизнинг қўллаб-қувватловимиз ўзгармайди. Россия бизнинг қатъиятимизга шубҳа қилмаслиги керак ва Украина учун узоқ муддатли ҳамда адолатли тинчликка эришмагунча ортга чекинмаймиз”, деган Бернэм.

Ташриф давомида Бернэм ва Зеленский сўнгги уч ҳафта давомида Британияда “Sea Breeze” машғулотларида иштирок этган 200 дан ортиқ украиналик ҳарбий хизматчи ва денгизчилар билан ҳам учрашади. Машғулотлар Қора денгиздаги бўлажак операцияларга тайёргарлик кўриш мақсадида денгиз хавфсизлиги ва минага қарши ҳаракатларни ўз ичига олади.

Бош вазир матбуот хизматининг маълум қилишича, Россия 2022 йилда Украинага кенг кўламли босқин бошлаганидан бери Буюк Британиянинг Украинага кўрсатган умумий ёрдами 25 миллиард фунт стерлингга етган. Шундан 16 миллиард фунти ҳарбий, 5,6 миллиард фунти эса ноҳарбий ёрдамга тўғри келади.

Бернэмнинг ўтмишдоши Кир Стармер шу ой бошида лавозимини тарк этишидан бир неча кун олдин Киевга ташриф буюриб, Украинага Швецияда ишлаб чиқарилган 16 та Gripen қирувчи самолётидан иборат эскадрильяни жиҳозлаш учун 300 миллион евро ажратилишини ваъда қилган эди.

Эслатиб ўтамиз, аввалроқ АҚШ Президенти Дональд Трамп ва Буюк Британиянинг янги Бош вазири Энди Бернэм илк телефон мулоқотини ўтказган эди.