“Бепул нон тарқатарди”. Олмаотада ўзбекистонлик новвой ўлдирилди (видео)

Жорий йилнинг 26 август куни Қозоғистоннинг Олмаота вилояти Оқтош қишлоғидаги можаро пайтида Ўзбекистон фуқароси пичоқлаб ўлдирилди. Марҳум 35 ёшда бўлган, охирги беш йил давомида у новвойхонада ишлаб, нон сотган. Бу ҳақда “Ulysmedia” хабар берди.

Маҳаллий аҳолининг сўзларига кўра, эркак қишлоқда ўзини жуда яхши томондан кўрсатган ва ҳеч ким билан можарога бормаган. У тез-тез одамларга ёрдам берган, жума кунлари эса бепул нон тарқатган.

Дастлабки маълумотларга кўра, марҳум ва 56 ёшли эркак ўртасида оғзаки низо келиб чиқиб, у муштлашувга айланиб кетган. Тергов талқинига кўра, можаро пайтида гумонланувчи пичоқ чиқариб, эркакка ўлимга сабаб бўлувчи жароҳатлар етказган.

Олмаота вилояти полициясининг маълум қилишича, қотиллик факти бўйича жиноят иши қўзғатилган. Тезкор-қидирув тадбирлари давомида 56 ёшли гумонланувчи аниқланиб, қўлга олинган. Ҳозирда у вақтинча сақлаш ҳибсхонасида. Полиция департаменти маълумотларига кўра, эркак ўз айбига иқрор бўлган.

Эслатиб ўтамиз, аввалроқ Қозоғистон Республикасининг Қизилўрда вилоятида рўй берган йўл-транспорт ҳодисаси оқибатида 3 ўзбекистонлик ҳалок бўлган эди.