Беларусда НЕХТА асосчилари террорчилар деб эълон қилинди

Беларусь Давлат Хавфсизлик Қўмитаси НЕХТА Telegram канали асосчиси Степан Путило ва унинг собиқ бош муҳаррири Роман Протасевични террористик фаолиятга алоқадор ташкилотлар ва шахслар рўйхатига қўшди. Бу ҳақда Беларусь ДХҚ сайтида хабар берилди.

Давлат Хавфсизлик Қўмитасининг террористик фаолиятга алоқадор ташкилотлар ва шахслар рўйхатига киритилган жами 726 та шахсларнинг фақат икки нафари Беларусь фуқароси. Улар Польшада яшаётган НЕХТАга алоқадор Степан ва Роман.

Роман Протасевич ўзининг Беларусь ДХҚ томонидан террорчилар рўйхатига киритилишига Twitter саҳифасида кинояли муносабат билдиришга ҳам улгурди.

“Мени расман террорчи деб тан олишибди. Ҳа, бу ҳазил эмас. Беларусь ДХҚ мени террорчилар рўйхатига киритди. Энди менинг исмим ИШИД аъзолари билан битта рўйхатда... Режимнинг бутун фаолияти давомида Лукашенконинг бирон бир рақиби бундай эътирофга сазовор бўлмаган!”, деб ёзади НЕХТА Telegram каналининг собиқ бош муҳаррири Роман Протасевич. 

Я ОФИЦИАЛЬНО ПРИЗНАН ТЕРРОРИСТОМ

Да, это не шутка. КГБ Беларуси внёс меня в список террористов. Теперь моя фамилия стоит в одном списке с ребятами из ИГИЛ. pic.twitter.com/k74wdaT1lR

— Roman Protasevich (@pr0tez) November 19, 2020

Жорий йилнинг 16 ноябрь куни Беларусь Ташқи ишлар вазирлиги Польшанинг Муваққат ишлар вакилига НЕХТА Telegram канали асосчиси Степан Путило ва унинг собиқ бош муҳаррири Роман Протасевични Беларусга топшириш талаби қўйилган нотани берган эди. 

Польша Европарламент томонидан Сахаров номидаги “Эркин фикр учун” мукофотининг совриндори деб эълон қилинган Степан Путилони Беларусга топшириши амримаҳол. 

Гап шундаки, жорий йилнинг 9 август куни бўлиб ўтган Беларусь Президентлик сайловларида Александр Лукашенко ғалабасига қарши бошланган намойишларни 1,7 миллионлик аудиторияга эга НЕХТА Telegram канали ёритиб, Минскда кучишлатар тузилмалар томонидан намойишчиларга қилинаётган муносабат ва кўлланилаётган куроллар ҳақида дунё ҳамжамиятига хабар бериб келяпти.