Бекхэм Британиянинг илк миллиардер спортчиси бўлди

“Манчестер Юнайтед” ва “Реал Мадрид”нинг собиқ футболчиси сер Дэвид Бекхэм британиялик спортчилар орасида бойлиги 1 миллиард фунт стерлингдан ошган илк спортчига айланди. Бу ҳақда “The Times” хабар берди.

Нашр маълумотига кўра, собиқ футболчи ва унинг рафиқаси Виктория Бекхэмнинг умумий бойлиги ҳозирда тахминан 1,185 миллиард фунт стерлингга баҳоланмоқда. Бу кўрсаткич ўтган йилга нисбатан 500 миллион фунт стерлингга ошган.

Бойликнинг сезиларли ўсиши Бекхэмнинг АҚШдаги инвестициялари, хусусан унинг “Интер Майами” клубидаги улуши қиймати ортгани билан боғлиқ. Клубнинг Лионель Месси билан шартнома имзолаши ҳам бунга катта таъсир кўрсатган.

“Forbes”нинг сўнгги миллиардерлар рейтингига кўра, спорт оламидаги энг бой инсонлар қаторидан Майкл Жордан (4,3 миллиард доллар), Мэжик Жонсон (1,6 миллиард доллар), Леброн Жеймс (1,4 миллиард доллар), Тайгер Вудс (1,5 миллиард доллар) ҳамда Рожер Федерер (1,1 миллиард доллар) ҳам жой олган.

Маълумот учун, 51 ёшли Бекхэм футболчилик фаолияти давомида “Манчестер Юнайтед”, “Реал Мадрид”, “Милан”, “Лос-Анжелес Галакси” ҳамда “Пари Сен-Жермен” сафида тўп сурган.

“Манчестер Юнайтед” билан у олти карра Англия чемпиони, икки карра Англия кубоги соҳиби ва UEFA Чемпионлар лигаси ғолибига айланган. “Реал Мадрид” билан Ла Лига ва Испания Суперкубогини қўлга киритган. ПСЖ сафида Франция чемпиони бўлган, “Лос-Анжелес Галакси” билан эса икки марта MLS кубогида ғолиб чиққан.

Шунингдек, Бекхэм Англия терма жамоаси сафида 115 та учрашувда майдонга тушиб, 17 та гол урган.