Бекинмачоқ ўйнаб йўқолиб қолган бола 35 йилдан кейин топилди

Хитойда болалигида дўстлари билан бекинмачоқ ўйнаётган пайтда тасодифан поездга чиқиб кетиб, 35 йил давомида бедарак йўқолган эркак ниҳоят биологик оиласи билан учрашди. Бу ҳақда “South China Morning Post” хабар берди.

Қайд этилишича, 1991 йилда Хитойнинг Хэнан вилоятида яшаган кар ва сўзлай олмайдиган Лей Зэцин дўстлари билан ҳазиллашиб поездга чиққан ва ўриндиқ остида ухлаб қолган. У уйғонганида эса туғилиб ўсган ҳудудидан қарийб 1,5 минг километр узоқликдаги Гуандун вилоятининг Шэньчжэнь шаҳрига бориб қолган. Мулоқот қила олмагани сабабли у кимлигини ва қаердан эканини тушунтира олмаган ва уйига қайта олмай, Шэньчжэнь темир йўл вокзали атрофида уйсиз бола сифатида яшай бошлаган.

Кўп ўтмай, маҳаллий аёл унга ёзишни ўргатган. Беш йил ўтгач, аёл Гонконгга кўчиб кетган. Шундан сўнг Шэньчжэнь темир йўл вокзали яқинидаги ресторан эгаси Хун Сян Сян Лейни ўз қарамоғига олган. У Лейни ресторан ходимлари ётоқхонасига жойлаштириб, бепул овқат билан таъминлаган. Ресторан икки йилдан сўнг фаолиятини тўхтатган бўлса-да, Хун Лейга бошқа иш топиб берган. Хун ва унинг рафиқаси, ўзларининг икки фарзанди бўлишига қарамай, Лейга қарийб 30 йил давомида ўз фарзандидек ғамхўрлик қилган.

Лей бу йиллар давомида биологик оиласини излашдан воз кечмайди. У интернет орқали қидирув эълонларини жойлаштиради, болалик хотиралари билан боғлиқ ҳудудларни поездда кезади. Хун эса унга полицияга мурожаат қилиш, маҳаллий газеталарда қидирув эълонлари бериш ва ДНК таҳлилидан ўтишда ёрдам беради.

Ниҳоят, Лейнинг ҳам кар ва сўзлай олмайдиган акаси Лей Зэху мессенжер иловасидаги гуруҳлардан бирида укасининг қидирув хабарини кўриб қолади. Лей болалигидан исм-фамилиясини тескари тартибда ёзиш одатини сақлаб қолгани акасига уни таниб олишга ёрдам беради. Улар интернет орқали бир неча бор мулоқот қилгач, Лей ДНК таҳлилидан ўтади ва натижалар уларнинг биологик ака-ука эканини тасдиқлайди.

2026 йил 11 июнь куни Лей отаси, акаси ва опаси билан 35 йиллик айрилиқдан сўнг Шэньчжэнда кўз ёшлар билан учрашган. Учрашувдан икки соат ўтиб чиққан ДНК натижалари уларнинг қариндошлигини расман тасдиқлаган. Биологик оиласи Лейга ўттиз йил давомида ғамхўрлик қилган Хун ва унинг рафиқасига алоҳида миннатдорлик билдирган.

“Укамнинг ногиронлигига қарамай, уни ўз фарзандингиздек тарбиялаганингиз учун сизга катта раҳмат”, дейди Лейнинг опаси.

Лей эса биологик ота-онаси билан бир қаторда, Шэньчжэнда унга бошпана ва меҳр берган оилани ҳам ҳеч қачон унутмаслигини айтган.

“Биологик ота-онам олдидаги бурчимни ҳам, Шэньчжэндаги ота-онамнинг меҳрини ҳам ҳеч қачон унутмайман”, деган у.