Байденнинг қанча пенсия олиши маълум бўлди

АҚШнинг собиқ президенти Жо Байден Америка президентлари тарихидаги энг катта нафақани олмоқда. Бу ҳақда “New York Post” хабар берди.

Нашрнинг ёзишича, АҚШ Миллий солиқ тўловчилар жамғармаси вице-президенти Демиан Брэди журналистлар билан ўз ҳисоб-китобларини ўртоқлашиб, уларга кўра 83 ёшли Байден президентликдаги биринчи йилида икки пенсия жамғармасидан жуда катта миқдорда маблағ олган бўлиши эҳтимоли юқори эканини айтган.

Брэдининг сўзларига кўра, Байден АҚШ тарихидаги барча собиқ президентлар орасида энг йирик давлат пенсияси билан нафақага чиққан – йилига 417 минг доллар, бу эса унинг президентлик давридаги 400 минг долларлик маошидан ҳам юқори.

Мутахассиснинг таҳлилига кўра, бу сумма Барак Обама Оқ уйда лавозимини тарк этганида олган пенсия миқдоридан икки баравар кўп. Брэдининг айтишича, бу ҳолат Байденнинг собиқ сенатор, вице-президент ва президент сифатидаги “ўзига хос вазияти”ни ҳам акс эттиради. Айнан шу мартаба йўли унга солиқ тўловчилар ҳисобидан молиялаштириладиган бир нечта пенсия жамғармаларидан фойдаланиш имконини берувчи “ҳуқуқий бўшлиқ”дан фойдаланган ҳолда тўловлар олишга йўл очган.

Бир пайтлар ўзини Конгрессдаги “энг камбағал аъзолардан бири” деб таърифлаган Байден 1958 йилдаги “Собиқ президентлар тўғрисида”ги қонун доирасида белгиланган имтиёзлар ҳамда собиқ сенаторлар учун мўлжалланган Давлат хизмати пенсия тизими (CSRS) орқали бир вақтнинг ўзида икки манбадан йирик тўловлар олиш имконига эга.

CSRS пенсия дастурида йиллик тўлов миқдори Байденнинг Сенатда ва вице-президент лавозимида ўтган 44 йиллик фаолияти, шунингдек шу даврдаги энг юқори уч йиллик маоши ҳисобга олинган формула асосида белгиланади.

Брэдининг сўзларига кўра, Байденнинг бошланғич пенсияси турмуш ўртоғи учун ажратилган 18 186 долларни ҳам қўшган ҳолда 166 374 долларгача етиши мумкин. У бу ҳисоб-китоб Байден сенаторлик пенсияси миқдорини максимал даражада оширишга интилган деган тахминга асосланганини таъкидлаган.

Агар йиллик тўловлар энг юқори маошининг 80 фоизи билан чекланмаганида, собиқ президент CSRS орқали йилига 254 минг доллардан ортиқ пенсия олган бўларди. Бу энг юқори маош эса вице-президент ва Сенат раиси сифатида олган йилига 230 700 долларни ташкил этган.