Байден Украинага қарийб 2,5 млрд доллар ажратди

Бугун, 30 декабрь куни АҚШ Президенти Жо Байден Украинага қарийб 2,5 миллиард долларлик хавфсизлик ёрдамини эълон қилди. Бу ҳақда Оқ уй матбуот хизмати хабар берди.

Қайд этилишича, қўшимча равишда 1,25 миллиард долларлик ҳарбий ёрдам ва 1,22 миллиард долларлик Украинага хавфсизлик ёрдами ташаббуси (USAI) пакетлари тақдим этилади. Бу Украина ҳарбийлари жанг майдонида самарали фойдаланаётган қисқа муддатли имкониятларни ва узоқ муддатли ҳаво ҳужумидан мудофаа, артиллерия ва бошқа қурол тизимлари каби зарур таъминотни қамраб олади.

“Бу йил бошида ваъда қилганимдек Мудофаа вазирлиги апрель ойида Конгресс томонидан тасдиқланган маблағларнинг барча қолган қисмини USAI доирасида ажратди. Менинг маъмуриятим Конгресс томонидан тасдиқланган маблағлардан АҚШ ускуналарини Украинага етказиб беришда тўлиқ фойдаланмоқда. Мен ёрдамни имкон қадар тезроқ етказишни давом эттиришни топширдим”, дейилади баёнотда.

Билдирилишича, бу жараёнга эскирган АҚШ ускуналарини Украинага жўнатиш, уларни жанг майдонига тезкор етказиш ва АҚШнинг мудофаа саноатини модернизация қилиш ва захираларни янги қуроллар билан тўлдириш киради.

“Мудофаа вазирлиги минглаб ракеталар, юз минглаб артиллерия снарядлари ва юзлаб зирҳли техникаларни етказиб бериш жараёнида. Булар қиш мавсуми яқинлашаётган бир пайтда Украинани мустаҳкамлашга хизмат қилади. Менинг кўрсатмамга биноан, Қўшма Штатлар Украина позициясини мустаҳкамлаш учун президентлик даврим охиригача тинимсиз ҳаракат қилади”, дейди Байден.

Эслатиб ўтамиз, аввалроқ Қўшма Штатлар Россия ҳужумларини қайтариш учун Украинага тахминан 1,25 миллиард долларлик янги ҳарбий ёрдам пакетини тайёрлаётгани хабар қилинган эди.