Байден Трамп ва унинг жамоасини олқишлади

АҚШнинг собиқ президенти Жо Байден амалдаги Президент Дональд Трамп ва унинг жамоаси фаолияти учун ўз миннатдорлигини билдирди. Бу ҳақда у Х ижтимоий тармоғидаги саҳифасида ёзиб қолдирди.

Қайд этилишича, Байден Трамп ва унинг жамоасини Ғазо секторида ўт очишни тўхтатиш бўйича келишувга эришиш йўлидаги фаолиятини юксак қадрлашини айтган. У бу келишувга эришиш йўли осон бўлмаганини ҳам таъкидлаган.

Шунингдек, Байден гаровга олинган 20 нафар исроиллик озод этилганидан хурсандлигини билдирган. Унинг фикрича, Яқин Шарқ Байден барқарор бўлишига умид қилган тинчлик сари қадам ташламоқда.

“Ушбу келишувга олиб борадиган йўл осон бўлмади. Менинг маъмуриятим гаровга олинганларни уйларига олиб келиш, Фаластин халқига ёрдам кўрсатиш ва урушни тугатиш учун тиним билмай ишлади. Президент Трамп ва унинг жамоасини ўт очишни тўхтатиш келишувидаги фаолияти учун олқишлайман”, деб ёзган Байден.

Эслатиб ўтамиз, кеча, 13 октябрь куни АҚШ Президенти Дональд Трамп, Туркия Президенти Ражаб Тойиб Эрдўған, Миср Президенти Абдулфаттоҳ ас-Сиси ва Қатар Амири шайх Тамим бин Ҳамад Ол Соний Мисрнинг Шарм-ал-Шайх шаҳрида ўтган саммитда Ғазо бўйича тинчлик келишувини имзолаганди.

Бунёд Келдибоев