“Барселона” устози “Эль-Класико”ни ўтказиб юборади

Испания Қироллик футбол федерацияси (RFEF) тартиб-интизом қўмитаси “Барселона”нинг Ҳанси Флик олган қизил карточка бўйича апелляциясини рад этди. Натижада немис мураббийи “Реал Мадрид”га қарши “Эль-Класико” учрашувида захира ўриндиғида бўла олмайди. Бу ҳақда AS нашри хабар берди.

Қўмита қарорида айтилишича, клуб Фликнинг четлатилиши “адолатсиз бўлганини” исботловчи “ҳеч қандай далил тақдим этмаган”. Шунинг учун, RFEF Интизом кодексининг 120-моддасига мувофиқ, унга бир ўйинга дисквалификация жазосини сақлаб қолган.

“Барселона” ўз баёнотида ҳакам ҳисоботида келтирилган воқеалар “ҳақиқатга тўғри келмаслигини” билдирган ва Фликка берилган икки огоҳлантиришни бекор қилишни сўраган эди. 

“Барселона” устози жорий йилнинг 18 октябрь куни “Жирона”га қарши ўйинда ҳакам Хесус Хиль Мансанога норозилик билдиргани учун майдондан четлатилган эди. Аввалига у сариқ карточка олган, кейинчалик эса Стуани ва Кристенсен ўртасидаги эпизоддан сўнг ҳакамнинг қарорига кескин эътироз билдиргани учун иккинчи огоҳлантиришни олиб, қизил карточка билан майдонни тарк этган эди.

Шу тариқа, “Барселона” бош  мураббийи “Бернабеу”даги учрашувда жамоасига майдондан туриб ёрдам беролмайди. Клуб апелляцияни кейинги босқичга RFEF'нинг Апелляция қўмитасига юбориши мумкин, бироқ “Эль-Класико”га қадар янги қарор чиқиши эҳтимоли жуда паст.

Маълумот учун, “Реал Мадрид” ва “Барселона” жамоалари ўртасидаги учрашув жорий йилнинг 26 октябрь куни Тошкент вақти билан соат 20:15 бўлиб ўтади.