“Барселона” Пересни судга бермоқчи

Агар “Реал Мадрид” президенти Флорентино Перес “Барселона”га нисбатан айтган сўзларини рад этмаса, унга қарши туҳмат бўйича судга мурожаат қилинади. Бу ҳақда Каталония клуби матбуот хизмати хабар берди. 

Клуби хабарига кўра, Пересга қарши Испания Жиноят кодексининг 205-моддаси (туҳмат) бўйича жиноий даъво киритишдан олдин мажбурий ярашув тартибида мурожаат йўлланган.

“Барселона” мазкур чора жорий йилнинг 12 май куни бўлиб ўтган матбуот анжуманида ҳамда кейинги куни ОАВга берган интервьюсида Флорентино Перес томонидан айтилган фикрлар муносабати билан кўрилаётганини маълум қилган.

Клуб баёнотида қайд этилишича, мурожаатнинг асосий мақсади Пересни “Барселона”нинг шаъни ва ишчанлик обрўсига путур етказувчи, ҳақиқатга тўғри келмайдиган баёнотларни тан олиш ва уларни рад этишга ундашдан иборат.

“Агар ушбу мурожаат қониқарли тарзда ҳал этилмаса, клуб тегишли жиноий даъво билан судга мурожаат қилади”, дейилади “Барселона” баёнотида.

Эслатиб ўтамиз, аввалроқ Флорентино Перес журналистлар билан мулоқот чоғида “Барселона” ҳамда Испания Техник ҳакамлар қўмитасининг собиқ вице-президенти Хосе Мария Негрейра ўртасидаги муносабатлар коррупцион хусусиятга эга бўлганини айтган эди. Шунингдек, у мазкур иш бўйича тегишли ҳужжатлар UEFA’га тақдим этилганини ва “Барселона”дан 23 совринни тортиб олиш кераклигини айтиб ўтганди.