БАА Президенти Flydubai самолётини қутқарган учувчиларни тақдирлади

Бирлашган Араб Амирликлари Президенти Шайх Муҳаммад бин Зоид Ол Наҳаён жорий йилнинг 30 сентябрь куни самолётни эгаллаб олишга уринишнинг олдини олган Flydubai авиакомпанияси экипажини мукофотлади. Бу ҳақда “Khaleej Times” нашри хабар берди.

Қайд этилишича, экипаж аъзоларига “Зоид II” орденининг биринчи даражаси топширилган. Ушбу мукофот одатда БАА билан ҳамкорликни мустаҳкамлаш ва давлат хизматидаги ҳиссаси учун хорижий элчилар, дипломатлар, юқори лавозимли амалдорлар ҳамда халқаро арбобларга берилади.

Мукофотларни Дубай валиаҳд шаҳзодаси, БАА Бош вазири ўринбосари ва Мудофаа вазири Шайх Ҳамдан бин Муҳаммад бин Рашид Ол Мактум тантанали маросимда топширган. У экипаж аъзоларининг йўловчилар хавфсизлигини таъминлаш йўлида кўрсатган жасорати ва масъулиятини юқори баҳолаган.

БАА Президентининг дипломатик маслаҳатчиси Анвар Гаргаш ҳам экипажни эътироф этиб, уларнинг ҳаракатларини инсон ҳаётини асраш йўлидаги жасорат намунаси деб атаган.

Flydubai самолётини эгаллаб олишга уриниш

Жорий йилнинг 30 сентябрь куни Дубайдан Тель-Авивга учаётган Flydubai авиакомпаниясининг йўловчи самолёти уни эгаллаб олишга уриниш ҳақидаги сигналдан сўнг Саудия Арабистонининг Табук шаҳри аэропортига фавқулодда қўндирилганди. Бунга учувчилар кабинасидаги мушталашув сабаб бўлган. Мушталашув давомида самолёт бор-йўғи 29 сония ичида баландликни 9410 метрдан 5105 метргача кескин йўқотган.

Boeing 737 MAX 8 бортида 174 киши, жумладан, 27 нафар бола бўлган, уларнинг аксарияти Исроиль фуқаролари. Баъзи йўловчиларнинг сўзларига кўра, аввалига пилотлар кабинасидан бақир-чақир эшитилган, кейин кабина эшиги кенг очилиб кетган ва улар бир пилотнинг жароҳатланганини, кийимлари қонга беланганини кўрган. Унга биринчи ёрдам кўрсатилган, йўловчилардан бири шифокор бўлиб чиққан. Экипаж аъзолари ва рейс йўловчилари ҳужум қилган шахсни зарарсизлантиришга ҳам муваффақ бўлган.

Рейс учувчиси жароҳатлар билан Саудия Арабистонида шифохонага ётқизилган Ҳиндистон фуқароси Смит Маччхар бўлган. Ҳиндистон Бош вазири Нарендра Моди билан видеоалоқа орқали мулоқотда у ҳужумдан сўнг самолёт баландликни жадал йўқотаётганини ва вақт деярли қолмаганини тушунганини айтиб берган.

“Мен полда жароҳатланиб ётардим, лекин ўзимга сўнгги ҳаракатни қилиб, эшикни ичкаридан очишим кераклигини айтдим. Эмаклаб боришга ҳаракат қила бошладим. Эшик жуда яқин эди. Уни очишга муваффақ бўлдим ва бошқа одамлар кириб келишди”, дейди у.

Моди учувчининг ҳаракатларини кўпчиликнинг ҳаётини сақлаб қолган мардлик, ирода ва тезкор қарор қабул қилиш қобилиятининг намоён бўлиши деб атаган.

“The Telegraph” маълумотларига кўра, ҳужум пайтида Маччхар бўйнидан оғир жароҳат олган, унинг чап қўли эса деярли кесилиб кетган эди. Шифохонадан эълон қилинган кадрларда унинг боши ва қўлларида боғламларни кўриш мумкин.

Гувоҳларнинг айтишича, ҳужумдан сўнг учувчи кўп қон йўқотиб, аста-секин ҳушидан кетган. Унга йўловчилардан бири, стоматолог Шота Мусаев ёрдам кўрсатган.

Саудия Арабистонига қўнишни авиаҳалокатнинг олдини олган ҳолда, бортда йўловчи сифатида кетаётган бошқа икки учувчи амалга оширган. CNN телеканалининг аниқлик киритишича, самолётни кейинги рейсни бажариши керак бўлган икки нафар “заҳирадаги пилот” қўндирган.