Баъзи сиёсатчилар ChatGPT ёрдамида нутқларни тайёрламоқда – Тўқаев

Қозоғистон Президенти Қосим-Жомарт Тўқаев баъзи сиёсий етакчилар ChatGPT сунъий интеллектидан фойдаланиб, нутқларини ёзаётгани ҳақида ҳазил қилди. Бу ҳақда у кеча, 26 июнь куни Минскда Евросиё иқтисодий форумининг ялпи мажлисида сўз очди.

“Бугунги кунда сунъий интеллект алоқа, транспорт, энергетика, ишлаб чиқариш, соғлиқни сақлаш ва таълим каби анъанавий кўринадиган соҳаларга жорий этилмоқда. Албатта, сунъий интеллектни жорий этиш билан боғлиқ салбий жиҳатлар ҳам бор. Мана ChatGPT. Талабалар ушбу воситадан фойдаланади. Айтишларича, баъзи сиёсий раҳбарлар ҳам тўғри нутқ тузишда ёрдам бериш учун ChatGPT'га мурожаат қилади”, деди у.

Шу билан бирга, Қозоғистон Президенти бу сунъий интеллект ва умуман рақамлаштиришнинг “ён таъсири” эканини таъкидлади.

“Аммо ҳозир усиз қилолмаймиз. Айтиш мумкинки, бу глобал тараққиётнинг асосий йўналиши”, деди Тўқаев.

Унинг қўшимча қилишича, прогнозларга кўра, рақамлаштириш ва сунъий интеллект 2030 йилга бориб жаҳон ялпи ички маҳсулотига 15 триллион доллардан кўпроқ даромад келтириши ва 300 миллионгача иш ўрни ўрнини босиши, бироқ “мутлақо янги касбларни яратиши” мумкин.

“Ва бу янги касблар нима? Келинг, биргаликда ўйлаб кўрайлик ва, таъбир жоиз бўлса, прогноз қилишга ҳаракат қилайлик. Сунъий интеллект қаердан пайдо бўлиши, кимнинг ўрнини эгаллаши ҳозирча аниқ эмас”, дея таклиф қилди у.

Тўқаев, шунингдек, Қозоғистонда рақамли инфратузилма фаол ривожланаётганини таъкидлади.

“Мен шахсан бу ишда иштирок этаман. Биз миллий рақамли инфратузилмани изчил ривожлантирмоқдамиз ва яқин келажакда биз энг юқори ҳисоблаш қувватига эга суперкомпьютерни ишга туширамиз. Унинг ресурслари илмий тадқиқотлар, моделлаштириш, катта маълумотларни қайта ишлаш ва энг мураккаб муҳандислик муаммоларини ҳал қилишга йўналтирилади”, деди у.

Президент дунёнинг етакчи технология компаниялари билан камида икки ярим йил давомида шахсан музокаралар олиб борганини таъкидлади ҳамда республикада сунъий интеллектни тартибга солувчи қонун қабул қилишга ҳозирлик кўрилаётганини эслатди.

“Ишончим комилки, давлатларнинг тизимли ва қатъий сиёсати, Евросиё маконида уларнинг саъй-ҳаракатларини бирлаштириш сунъий интеллектни барқарор ўсиш ва иқтисодиётимизнинг глобал рақобатбардошлиги манбаига айлантиради. Қозоғистонга келсак, биз иқтисодий интеграцияни янада мустаҳкамлаш ва ривожлантириш тарафдоримиз ва Евросиё маконида иқтисодий ҳамкорликни ривожлантириш бўйича тизимли, самарали ҳамкорликда иш олиб боришга тайёрмиз”, деди у.