Айрим қурилиш материаллари импортига бож бекор қилинади

Аҳолини арзон уй-жой билан таъминлаш учун қурилиш таннархини пасайтириш мақсадида 2025 йилгача айрим қурилиш материаллари импортига бож бекор қилинади. Бу ҳақда бугун, 5 апрель куни Президент раислигида 2023 йилги ипотека дастури муҳокамасига бағишланган йиғилишда маълум қилинди.

Қурилиш таннархини пасайтириш мақсадида:

- 2025 йилга қадар ёғоч, фанера, ёғочли опалубка ва ойнани импорт қилишда божхона божини бекор қилиш;
- юқори маркали цемент бўйича божхона божи имтиёзини яна 1 йилга узайтириш (бунинг ҳисобига уй-жой қуриш таннархи 5 фоизгача пасаяди);
- пудрат ташкилотларига қурилаётган уйни қаватма-қават гаровга қўйиш ва ҳар бир қавати учун кредит олиш ҳуқуқини бериш;
- банклар берадиган кредитларни давлат томонидан қайта молиялаш амалиётини давом эттириш;
- қурувчиларга кафиллик ва компенсация тўлаш тартибини такомиллаштириш;
- аҳолига ўз уйини энергия тежамкор материаллардан фойдаланиб таъмирлашига 10 йилга 16,5 фоиздан 80 миллион сўмгача кредит беришга қарор қилинди.