Аёллар ўртасидаги “US Open” финалчилари аниқ бўлди

Қозоғистонлик Елена Рибакина ва беларуслик Арина Соболенко АҚШ Очиқ чемпионатининг финал учрашувида ўзаро тўқнаш келадиган бўлди. 

Мусобақа Нью-Йоркда бўлиб ўтмоқда. Ярим финалда иккинчи рақам остида сараланган Рибакина тўртинчи рақамли америкалик Коко Гауффни 3:6, 6:4, 6:4 ҳисобида мағлуб этди. Биринчи рақам остидаги Соболенко эса учинчи рақамли америкалик Жессика Пегулани 7:5, 6:2 ҳисобида таслим қилди.

Финал учрашуви эртага, 12 сентябрь куни бўлиб ўтади. 27 ёшли Рибакина мусобақа якунларига кўра Соболенкони ортда қолдириб, WTA рейтингида биринчи ўринга кўтарилади. Қозоғистонлик теннисчи фаолияти давомида WTA туркумидаги 13 та яккалик мусобақасида ғолиб чиққан. У 2022 йилда “Уимблдон”, 2026 йилда эса “Australian Open” турнирида чемпион бўлган. Шунингдек, Рибакина 2025 йилда WTA Finals мусобақасида ҳам ғолибликни қўлга киритган.

28 ёшли Соболенко эса 2024 йил октябрь ойидан буён WTA рейтингида етакчилик қилиб келаётганди. Беларуслик теннисчи яккалик баҳсларда 24 та титулни қўлга киритган.

Соболенко “Катта дубулға” туркумидаги яккалик баҳсларида тўрт марта – “Australian Open”да 2023 ва 2024 йилларда, “US Open”да эса 2024 ва 2025 йилларда чемпион бўлган. Жуфтлик баҳсларида ҳам у 2019 йилда “US Open”, 2021 йилда “Australian Open” турнирида ғолиб чиққан. Мазкур финал Соболенко учун “US Open”даги кетма-кет тўртинчи финал бўлади.

Маълумот учун, “US Open” мавсумдаги сўнгги “Катта дубулға” турнири ҳисобланади. Бу йилги мусобақа жорий йилнинг 13 сентябрь куни якунланади. Соболенко амалдаги чемпион ҳисобланади. Турнирнинг соврин жамғармаси рекорд даражадаги 108 миллион долларни ташкил этади.