Австралия МТЖ Жаҳон чемпионати учун мукофот пулини олмаган – ОАВ

Австралия терма жамоаси футболчилари 2026 йилда АҚШ, Канада ва Мексикада бўлиб ўтган Жаҳон чемпионатида иштирок этганликлари учун белгиланган мукофот пулини ҳалигача олмаган. Бу ҳақда “Australian Associated Press” хабар берди.

Манбага кўра, маблағлар мусобақа якунланганидан кейин икки ҳафта ичида футболчиларга ўтказилиши керак эди. Ҳар бир учрашувда асосий таркибда майдонга тушган ёки захирада қолган футболчига тахминан 6 минг Австралия доллари (4,1 минг АҚШ доллари) тўланиши белгиланган.

Мексика ва Швейцарияга қарши иккита ўртоқлик учрашуви ҳамда Жаҳон чемпионатидаги тўртта баҳсни ҳисобга олганда, терма жамоа таркибига киритилган футболчиларнинг ҳар бирига жами олтита ўйин учун 36 минг Австралия доллари (24,8 минг АҚШ доллари) тўланиши керак.

“Football Australia” нашри тўловлар кечикишини Шимолий Америкадаги солиқ мажбуриятларини аниқлаштириш зарурати билан изоҳлади. Ташкилот маблағларни ўтказишга тайёрлигини, бироқ мутахассисларнинг якуний хулосаси ва Австралия футболчилар ассоциациясидан (АФА) маблағларни тақсимлаш бўйича қўшимча маълумотларни кутаётганини маълум қилган.

АФА президенти Бо Буш бу ҳолатни қабул қилиб бўлмайдиган вазият деб атаган. Унинг таъкидлашича, халқаро солиқ масалаларини мусобақадан анча олдин прогноз қилиш ва ҳал этиш мумкин эди.

Агентлик маълумотига кўра, футболчилар жорий йилнинг сентябрь ойида Бразилияга қарши ўтказилган ўртоқлик учрашувлари учун белгиланган тўловларни тўлиқ олган.

Эслатиб ўтамиз, Австралия терма жамоасининг Жаҳон чемпионатидаги иштироки 1/8 финал босқичида Мисрга қарши баҳсда якунланган. Арлингтон шаҳридаги учрашув 1:1 ҳисобида тугаган, пенальтилар сериясида эса мисрликлар 4:2 ҳисобида ғалаба қозонган эди.